हिंजवडी, ता. ८ : क्रांतिवीर चापेकर स्मारक समिती संचलित खिंवसरा पाटील विद्या मंदिर शाळेत आयोजित विज्ञान प्रदर्शनात पहिली ते सातवीतील विद्यार्थ्यांनी अनेक प्रयोग व विविध विषयांवरील प्रकल्प सादर केले.
पर्यावरण प्रेमी व सर्पमित्र शुभम पांडे हे प्रमुख पाहुणे म्हणून उपस्थित होते. त्यांनी आपल्या व्याख्यानातून विद्यार्थ्यांना निसर्ग समजून घेण्याचे व निसर्ग वाचवण्याचे आवाहन केले. प्रदर्शनात प्रामुख्याने विकसित भारत, रेन वॉटर हार्वेस्टिंग, ज्वालामुखीचा उद्रेक, पाण्यात द्रव्य - अद्रव्य घटक, वॉटर अलर्ट अलार्म, स्मार्ट व्हिलेज सोलर एनर्जी इत्यादी प्रयोगांचा समावेश होता.
विज्ञान प्रयोग साकारण्यासाठी विद्यार्थ्यांना वर्गशिक्षक व विज्ञान विषय शिक्षक यांनी मार्गदर्शन केले. मुख्याध्यापिका मंजुषा गोडसे यांच्या मार्गदर्शनाखाली संयोजन झाले. स्वाती नांगरे यांनी प्रास्ताविक केले. शुभदा कानडे यांनी सूत्रसंचालन केले. मीना जाधव यांनी आभार मानले.