वाकड, ता. ११ : थेरगाव येथील बारणे वस्ती परिसरातील स्विस काउंटी सहकारी गृहरचना संस्थेमधील कामेश्वर मंदिरात हिंदू संमेलन उत्साहपूर्ण वातावरणात पार पडले. हिंदू समाजातील समरसता, संघटन व सामाजिक बांधिलकी यांचा संदेश देत संमेलनात विविध विषयांवर मार्गदर्शन करण्यात आले.
कार्यक्रमाच्या अध्यक्षस्थानी डॉ. जयंत बाहेती होते. प्रमुख वक्ते समीर कुलकर्णी, गायत्री परिवार वाघोली केंद्राचे प्रेम सारस्वतजी, गायत्री परिवार हरिद्वारचे सूरज सिंग, अमृत महाराज यांच्यासह स्थायी समितीचे अध्यक्ष अभिषेक बारणे, नगरसेवक तानाजी बारणे, कैलास बारणे, नगरसेविका योगिता बारणे, मनीषा पवार आदी उपस्थित होते. सूरज सिंह महाराज यांनी सनातन धर्मातील पर्यावरणपूरक परंपरा जसे वृक्षपूजन, भूमीपूजन यांचा पर्यावरण संवर्धनाशी असलेला संबंध स्पष्ट केला. तर कुलकर्णी यांनी ‘पंच परिवर्तन’ या संकल्पनेची व्याख्या स्पष्ट करत सामाजिक समरसतेचे महत्त्व अधोरेखित केले.
यावेळी गायत्री परिवाराच्यावतीने भजनसेवा झाली. अनुराधा कर्डिले यांनी मातृशक्तीच्या माध्यमातून पर्यावरण जनजागृतीचा संदेश दिला. विवेक सोनार यांनी सूत्रसंचालन केले. श्रीकांत डाहाळे यांनी आभार मानले.