वाकड, ता. १६ : वाकड-हिंजवडी परिसरातील वाहतूक समस्येवर उपाययोजनांच्या दृष्टीने दत्त मंदिर रस्त्यावरील उत्कर्ष चौक ते ब्लीस सोसायटी, ईडन टॉवर, वेदांत सोसायटी, महामार्गावरुन टीपटॉप हॉटेल भुयारी मार्गापर्यंतचा रस्ता अंतिम टप्प्यात आला आहे. येत्या १० ते १२ दिवसांत तो नागरिकांच्या सेवेत उपलब्ध होणार आहे.
या रस्त्याचे काम २०२२ पर्यंत काही प्रमाणात झाले. नियोजनानुसार रस्त्याची रुंदी १८ मीटर असली, तरी नागरिकांच्या सोयीचा विचार करून तातडीने ९ मीटर रुंदीचे काम सुरू करण्यात आले. जे आता पूर्णत्वास येत आहे. या संदर्भात नगरसेवक राहुल कलाटे यांनी महापालिकेच्या संबंधित अधिकाऱ्यांसह प्रत्यक्षस्थळी भेट देऊन कामाची पाहणी केली. तसेच उत्कर्ष चौकापासून दत्त मंदिर रस्ता तसेच ईडन आणि ब्लीस सोसायटी परिसरातील पदपथाचे उर्वरित काम तत्काळ पूर्ण करण्याच्या सूचना दिल्या.

पहिल्या शंभर दिवसांत पूर्ण करणार असे दिलेल्या आश्वासनांपैकी हे एक महत्त्वाचे आश्वासन पूर्ण करण्यात आले आहे. त्यादृष्टीने वाकडमधील रस्ते आणि मिसिंग लिंक प्रकल्पांना गती देण्यात आली आहे. नागरिकांनी पार्किंग आणि वाहतूक शिस्त पाळून आमच्या प्रयत्नांना सहकार्य करावे ही विनंती.
- राहुल कलाटे, नगरसेवक, पिंपरी चिंचवड महापालिका