वाकड, ता. २१ : ताथवडे गाडा रस्त्यावरील रहिवासी सोसायट्यांच्या परिसरात असलेला कचरा डेपो हटविण्याच्या मागणीसाठी ३० मेला कचरा डेपोजवळ मानवी साखळी आंदोलन करण्याचा निर्णय स्थानिक रहिवाशांनी घेतला.
या रहिवाशांची महत्त्वपूर्ण बैठक नुकतीच पार पडली. या बैठकीत विविध प्रतिनिधींमध्ये सविस्तर चर्चा होऊन पुढील आंदोलनाची दिशा निश्चित करण्यात आली. सकाळी ९ वाजता मानवी साखळी आंदोलन करण्यात येणार आहे. या आंदोलनात नागरिकांनी मोठ्या संख्येने सहभागी व्हावे, असे आवाहनही करण्यात आले असून प्रभागातील सर्व नगरसेवक तसेच सर्वपक्षीय नेत्यांना आंदोलनासाठी निमंत्रित करण्याचे ठरविण्यात आले.
परिसरातील सर्व सोसायट्यांकडून कचरा डेपो विरोधातील निवेदने पुन्हा संकलित करण्याचा निर्णय घेण्यात आला. आंदोलनाला व्यापक पाठिंबा मिळावा यासाठी विविध समाज माध्यमांचा वापर करण्यात येणार आहे. ‘आता एकच ध्येय... कचरा डेपो हटाव,’ असा निर्धार यावेळी नागरिकांनी व्यक्त केला.