लोणावळा - तक्रारदाराच्या गॅस एजन्सीवर कारवाई न करण्यासाठी दोन लाख रुपयांची लाचेची मागणी करुन तडजोडीअंती दीड लाख रुपये लाच स्विकारल्याप्रकरणी लोणावळा ग्रामीणच्या पोलीस निरीक्षकासह तिघांवर गुन्हा दाखल करण्यात आला आहे. याप्रकरणी सहाय्यक फौजदार कुतुबुद्दीन गुलाब खान (वय-५२), खासगी इसम यासीन कासम शेख (वय-५८) यांना लाच लुचपत प्रतिबंधक विभागाच्या वतीने अटक करण्यात आली आहे.

लोणावळा ग्रामीणचे पोलीस निरीक्षक प्रवीण बाळासाहेब मोरे (वय-५०) यांच्यावर देखील गुन्हा दाखल झाला आहे. तक्रारदाराच्या गॅस एजन्सीवर कारवाई न करण्यासाठी मध्यस्थामार्फत २ लाख रुपयांची मागणी करण्यात आली होती. तक्रारदाराने (वय-३९) लाच लुचपत प्रतिबंधक विभागाकडे तक्रार दिली होती. शुक्रवारी (ता.१३) लोणावळा ग्रामीण पोलीस स्टेशन परिसरात सापळा लावण्यात आला होता. तडजोडअंती ठरलेली दीड लाख रुपयांची लाच खासगी इसम यासीन शेख यांच्यामार्फत स्विकारताना सहाय्यक फौजदार कुतुबुद्दीन खान यांस लाच लुचपत प्रतिबंधक विभागाने रंगेहात पकडले. कारवाईची माहिती मिळताच निरीक्षक मोरे फरार झाले. शनिवारीही (ता.१४) लाच लुचपत प्रतिबंधक विभागाची कारवाई सुरू होती. पोलीस अधीक्षक राजेश बनसोडे, अपर पोलीस अधीक्षक सुरज गुरव यांच्या मार्गदर्शनाखाली पोलिस उपअधीक्षक विजयमाला पवार, पोलीस निरीक्षक प्रविण निंबाळकर, कर्मचारी मुश्ताक खान, अंकुश आंबेकर, सौरभ महाशब्दे, पूजा डेरे, दामोदर जाधव, चंद्रकांत कदम यांच्या पथकाने ही कामगिरी केली.