पिंपरी : थेरगावातील पवना नदीपात्राजवळून येत असताना, मामा-भाचे नदीत बुडाले. यातील एकाचा मृतदेह बाहेर काढला असून, आणखी एकाचा पिंपरी-चिंचवड अग्निशामक दलाचे जवान शोध घेत आहेत. पिंटू विठ्ठल गायकवाड (वय ३५, रा. ज्योतिबानगर, काळेवाडी) असे मृतदेह सापडलेल्या तरुणाचे नाव असून, ओम किसन जाधव (वय २५, सर्व रा. विठ्ठल-रुक्मिणी मंदिर कॉलनी, काळेवाडी) या तरुणाचा अग्निशामक  विभाग शोध घेत आहे.  

- ताज्या बातम्यांसाठी डाऊनलोड करा ई-सकाळचे ऍप 

- पिंपरी-चिंचवडच्या बातम्या वाचण्यासाठी येथे ► क्लिक करा

रविवारी (ता. १५) सायंकाळी साडेपाचच्या सुमारास गायकवाड, जाधव व त्यांचे दोन नातेवाईक नदीपात्राजवळून थेरगावकडे येत होते. त्यावेळी पाठीमागून कोणीतरी आवाज दिल्याने  त्यांनी नदीत उडी मारली. त्यानंतर दोघेजण नदी पात्रातून बाहेर आले. मात्र, गायकवाड व जाधव हे मामा-भाचे पाण्यात बुडाले. याबाबतची माहिती सायंकाळी सहा वाजता पिंपरी-चिंचवड अग्निशामक दलास मिळाली. त्यानंतर अग्निशामक दलाकडून बचावकार्य सुरू आहे. रात्री उशिरापर्यंत दोघांचा शोध सुरू होता. अखेर सोमवारी (ता. १५) सकाळी सव्वा सहाच्या सुमारास गायकवाड यांचा मृतदेह सापडला, तर जाधव यांचा अद्यापही शोध सुरू आहे.