लोणावळा - पवना धरणात बुडाल्याने मुंबईतील दोन जणांचा दुर्दैवी मृत्यू झाल्याचा प्रकार शुक्रवारी (ता. ०२) घडला. सुदैवाने या घटनेत पाच जणांना स्थानिकांच्या मदतीने वाचविण्यात यश आले.

आर्या दिपक जैन (वय-१३) व समीर कुलदीप सक्सेना (वय-४३, दोघे रा. मुंबई) अशी बुडून मृत्यू झालेल्यांची नावे आहेत. पवना धरण परिसरात फांगणे येथे घडली. लोणावळा ग्रामीण पोलिसांनी दिलेल्या माहितीनुसार, मृत समीर कुलदीप सक्सेना हे पत्नी पायल (वय-४२),  मुले लक्ष (वय-१४), यश (वय-८) व त्यांचे मित्र आर्या जैन (वय-१३), आदी चुगानी (वय-१४), अंश सुरी (वय-१४, नोकर  रामकुमार पासवान याच्यासह शुक्रवारी पवना धरण परिसरात पर्यटनासाठी  आले होते. पवना धरण पाणलोट क्षेत्रातील‌ फांगणे गावच्या हद्दीत पवना धरणाच्या पाण्यात पोहत होते. यावेळी समीर आणि आर्या यांच्यासह इतर पाच जणांना येथील पाण्यातील खोलीचा अंदाज न आल्याने ते बुडू लागले. समीर सक्सेना यांचा कामगार रामकुमार पासवान यांनी आरडाओरड केला.

यावेळी स्थानिक नागरिक अनिल हिलम, संजय आंद्रे, रामदास चव्हाण, रोहिदास काळे, रामदास काळे, स्वप्नील मोकाशी यांनी तत्काळ धाव घेत पाण्यात बुडत असलेल्या बाहेर काढले. घटनेची माहिती लोणावळा ग्रामीण पोलिसांना घटनेची माहिती मिळताच लोणावळा ग्रामीणचे पोलीस कर्मचारी रफिक शेख व विजय गाले यांनी घटनास्थळी धाव घेतली. पोलीस हवालदार रफिक शेख यांनी घटनास्थळी जाताच पाण्यात उतरून स्थानिकांच्या मदतीने आर्या जैन व समीर सक्सेना यांना बाहेर काढले, मात्र समीर आणि आर्या यांचा पाण्यात बुडून दुर्दैवी मृत्यू झाला. पुढील तपास लोणावळा ग्रामीण पोलीस करीत आहेत.