पिंपरी : कोरोनाचा संसर्ग वाढू नये, म्हणून खबरदारीचा उपाय म्हणून पालिका प्रशासनाने शहरातील दुकाने सम-विषम तारखांना खुली करण्याची परवानगी दिली असली तरी अनेक भागांमध्ये या नियमाची ऐशी-तैशी झाल्याचे समोर आले आहे.

ताज्या बातम्यांसाठी डाऊनलोड करा ई-सकाळचे ऍप 

कोरोनाचा प्रादुर्भाव रोखण्यासाठी शहरातील दुकाने सम-विषम तारखांना उघडण्याचा नियम तयार करण्यात आला. नागरिकांची गर्दी कमी व्हावी, म्हणून हा उपाय करण्यात आला होता. मात्र, सध्याच्या परिस्थितीत अनेक भागांमध्ये रस्त्याच्या दोन्ही बाजूला असणारी दुकाने बिनदिक्‍कतपणे सुरु आहेत. त्यामुळे गर्दी कमी करण्यासाठी करण्यात आलेला नियम कागदावरच राहिला आहे. शहरातील चिखली, मोशी, काळेवाडी, पिंपरी, चिंचवड या परिसरातील अनेक भागांमध्ये रस्त्याच्या दोन्ही बाजूची दुकाने सुरु असल्याचे चित्र पाहायला मिळाले. 

पुण्याच्या बातम्या वाचण्यासाठी येथे  क्लिक करा

सोशल डिस्टन्सिगचेही तीन-तेरा...

अनेक भागांत रस्त्याच्या दोन्ही बाजूला असणारी दुकाने सुरु असताना त्याठिकाणी सोशल डिस्टन्सिंगच्या नियमाचे तीन-तेरा वाजल्याचे पाहायला मिळाले. मास्कचा वापर न करणे, दुकानांमध्ये ग्राहकांमध्ये ठराविक अंतर न ठेवणे, असे प्रकार बऱ्याच भागांमध्ये होत असल्याचे पाहायला मिळाले. 

कोरोना वाढण्याचा धोका...

सम विषम तारखांचा नियम धाब्यावर बसवून अनेकांकडून दुकाने खुली करण्यात येत असली तरी त्याठिकाणी होणाऱ्या गर्दीमुळे कोरोनाच्या विषाणूंचा संसर्ग वाढण्याचा धोका आहे. खाद्यपदार्थांची विक्री करणाऱ्या अनेक दुकानदारांनी पार्सल सुविधा उपलब्ध असा फलक लावलेला असताना देखील त्याठिकाणी दुकाना बाहेर थांबणाऱ्यांची संख्या वाढू लागली आहे, त्यामुळे कोरोना पसरु शकतो. त्यामुळे सम विषम तारखांच्या नियमांचे पालन न करणाऱ्या दुकानदारांना महापालिकेकडून समज देण्यात यावी, अशी अपेक्षा नागरिकांनी व्यक्‍त केली.

पुण्याच्या बातम्या वाचण्यासाठी येथे  क्लिक करा