- बेलाजी पात्रे

वाकड - समस्त वाकड ग्रामस्थ व मित्र परिवाराच्या वतीने सलग तेराव्या वर्षी संत ज्ञानेश्वर महाराज पालखी सोहळ्यातील वारकऱ्यांना अन्नदान सेवा देण्यात आली. दरवर्षीप्रमाणे येळीव (सोलापूर) मधील मांडवीच्या ओढ्याजवळ महापंगतीचे आयोजन करण्यात आले होते. यंदाही तब्बल पंधरा हजारांहून अधिक वारकऱ्यांना अन्नप्रसाद सेवेचा लाभ देण्यात आला.

शुक्रवारी (ता. २३) रात्री दत्त मंदिर परिसरात माणसांची गर्दी जमू लागली. हळूहळू ही गर्दी हजारांवर गेली. महापंगतीसाठी अन्नदानाचे साहित्य भरलेले दोन टेम्पो व अन्य तीस मोटारीमध्ये शंभरहून अधिक ग्रामस्थ सोलापूर जिल्ह्यातील येळीव (ता. माळशिरस) गावी रवाना होण्यासाठी सज्ज झाले.

पूजा करून म्हातोबाचा चांगभलं या जयघोषाणी अवघा वाकड दत्तमंदिर परिसर दुमदुमला. याच रात्री माऊलींच्या पालखीचा नातेपुतेत मुक्काम होता. शनिवारी (ता. २४) पहाटे ही सर्व मंडळी येळीव येथे पोहचले. अन शेकडो हातांची जेवण बनविण्याची लगबग सुरू झाली.

माऊलींच्या पालखीच्या नातेपुते येथील (सोलापूर) मुक्कामानंतर दुपारी बाराच्या सुमारास सदाशिव नगर येथे रिंगण होते. यानंतर दुपारचे भोजन व विसाव्यासाठी मांडवी ओढ्याला पालखी थांबते याचवेळी मध्यान्ह: भोजन वारकऱ्यांना दिले जाते.

यंदा व्हेज बिर्याणी, बुंदी अन पाण्याची बॉटल वाटण्यात आले. संपूर्ण दिवसभरात सायंकाळी पाच वाजेपर्यंत पंधरा हजारांहून अधिक वारकऱ्यांनी या अन्नदान सेवेचा लाभ घेतला. माऊलींच्या रथापुढे असणारी वाकड येथील निकम दिंडी क्रमांक १६ मधील वारकरी देखील या ठिकाणी विसाव्याला थांबत असतात.