पिंपरी : इमारतीचे पाया भरण्याचे काम सुरु असताना ढिगारा कोसळला. त्याखाली अडकून एका मजुराचा मृत्यू झाला तर एकजण जखमी आहे. ही घटना किवळे येथे घडली.संदीप बलसिंग (वय २०, रा. झारखंड) असे या घटनेत मृत्यू झालेल्या कामगाराचे नाव आहे. किवळे येथे एका इमारतीचे काम सुरु असून शनिवारी (ता. ११) दुपारी या इमारतीचा पाया भरण्याचे काम सुरु होते. येथे संदीप यांच्यासह इतरही कामगार काम करीत होते. दरम्यान, अचानक मातीचा ढिगारा कोसळला. यामध्ये संदीप अडकल्याने त्यांचा मृत्यू झाला. तर एक जखमी आहे. घटनेची माहिती मिळताच पोलिसांनी घटनास्थळी धाव घेतली. पोलिस अधिक तपास करीत आहेत.