पिंपरी : प्रेम भंग झाल्याने तरुणाने गळफास घेऊन आत्महत्या केली. ही घटना मारुंजी येथे घडली. पंकज श्रीकृष्ण उबाळे (वय २०, सध्या रा. मारुंजी, मूळ- रा. वाघाला, पो. नागपुरता, परळी वैजनाथ, जी. बीड) असे आत्महत्या केलेल्या तरुणाचे नाव आहे. याप्रकरणी त्यांच्या मामाने फिर्याद दिली आहे.

त्यानुसार पंकजच्या प्रेयसीसह तिच्या कुटुंबातील चौघांवर (सर्व रा. हेळम्ब, जी. लातूर ) गुन्हा दाखल झाला आहे. पोलिस उपनिरीक्षक महेंद्र गाढवे यांनी दिलेली माहिती अशी, आरोपी तरुणीने पंकज यांचा प्रेमभंग केला. तर तिच्या कुटुंबियांनी त्यांना शारीरिक व मानसिक त्रास दिला. या त्रासाला कंटाळून पंकज यांनी शुक्रवारी (ता. २७) मारुंजीतील ओयो फ्लॅगशिप या हॉटेलच्या रूममध्ये नायलॉन दोरीच्या सहाय्याने गळफास घेतला.

यामध्ये त्यांचा मृत्यू झाला. दरम्यान, आत्महत्येपूर्वी पंकज यांनी नातेवाईकांना मोबाईलवरून व्हाट्सअप मेसेज पाठवला. त्यामध्ये आपला प्रेमभंग झाल्याने तसेच तरुणीच्या कुटुंबियांनी शारीरिक व मानसिक त्रास दिल्याचे नमूद केले आहे. दरम्यान, पंकज यांना आत्महत्येस प्रवृत्त केल्याप्रकरणी सांगवी पोलिसांनी आरोपींवर गुन्हा दाखल केला आहे. अधिक तपास सुरु आहे.