अभिनेता अभय देओल कायमच त्याच्या हटके भूमिकांसाठी ओळखला जातो. त्याचे काका आणि भावंडं एकीकडे पूर्णपणे बॉलिवूडच्या वर्षानुवर्षे चालणाऱ्या पठडीतील भूमिकांसाठी प्रसिद्ध असताना अभयने मात्र 'ओए लक्की लक्की ओए','देव डी' अशा सिनेमांमध्ये काम करत स्वतःची वेगळी ओळख निर्माण केली आहे. पण यावेळी अभयने त्याच्या लैंगिकतेबाबत केलेल्या वादग्रस्त विधानामुळे चर्चेत आला आहे.

लैंगिकतेवर अभय म्हणाला...

अभयने नुकतीच द डर्टी मॅगझीनला त्याच्या आगामी सिनेमानिमित्त मुलाखत दिली. यावेळी त्याने विविध विषयांवर गप्पा मारल्या आणि त्यांच्या लैंगिकतेविषयी भाष्य केलं.तो म्हणाला, "लैंगिकतेच पाश्चिमात्य पद्धतीने केलेलं वर्गीकरण मला मान्य नाही. ती खूपच ब्लॅक आणि व्हाईट आहे. पूर्वेकडच्या देशांचा दृष्टिकोन याबाबत वेगळा आहे आणि तो आपल्या सगळ्यांना स्वीकारतो. मी माझ्या लैंगिकतेची व्याख्या सांगू शकत नाही कारण ते वादग्रस्त ठरू शकत. ही एक अशी गोष्ट आहे जी सांगू शकत नाही. मला वाटत ही अशी गोष्ट आहे जी समोरच्याला अधिक फायदेशीर आहे म्हणजे तो समोरच्याला एका साचेबद्ध चौकटीत बसवू शकेल. मला स्वतःला पाश्चिमात्य लैगिकतेच्या चौकटीत बसावं अस वाटत नाही. मी आयुष्यात सगळ्या प्रकारचे अनुभव घेतले आहेत आणि असे अनुभव घेणं मी सुरू ठेवेन.मला नाही माहीत याला काय नाव दिलं पाहिजे पण मला कोणतंच नाव द्यायचं नाहीये. आपल्या सगळ्यांमध्ये पुरुष आणि स्त्रीचे गुण असतात त्यामुळे मला वाटतं आपण सगळेही तेच आहोत."

इथे घालवतो रिकामा वेळ..

गेला बराच काळ अभय सिनेविश्वापासून दूर होता याविषयी सांगताना त्याने सांगितलं की, तो जास्तीत जास्त वेळ त्याच्या गोव्यामध्ये असलेल्या घरी घालवतो किंवा तो लॉस एंजलीस मध्ये राहतो. कारण तिथे तो सगळ्यांसाठी अनोळखी आहे.

आगामी प्रोजेक्ट

अभयचा आता 'बन टिक्की' हा सिनेमा प्रेक्षकांच्या भेटीस येणार आहे. या सिनेमात अभय बरोबर शबाना आझमी आणि झीनत अमान यांच्या मुख्य भूमिका आहेत.