Aashadhi Wari : आज आषाढी एकादशीचा उत्साह सगळीकडे पाहायला मिळतोय. सामान्यांच्या बरोबरीनेच सेलिब्रिटीजनी सुद्धा विठुरायाचं दर्शन घेत सगळ्यांना आषाढी एकादशीच्या शुभेच्छा दिल्या. अनेकजण विठ्ठलभक्तीत तल्लीन झाले. मराठी टेलिव्हिजन इंडस्ट्रीमधील एका अभिनेत्रीनेही पंढरपूरची वारी करत विठुरायाचं दर्शन घेतलं आणि तिचा अनुभव तिने सोशल मीडियावर शेअर केला.

सुंदरा मनामध्ये भरली फेम अभिनेत्री अक्षया नाईकने आज पंढरपूरला जाऊन विठ्ठलाचं दर्शन घेतलं. सोशल मीडियावर व्हिडीओ पोस्ट करत तिने तिचा अनुभव शेअर केला.

अक्षयाने सोशल मीडियावर पंढरपूरमधील व्हिडीओ शेअर केला असून या व्हिडिओमध्ये तिने पंढरपूरमधील आज उत्सवाचं वातावरण, वारकऱ्यांची लगबग आणि विठ्ठलाला भेटण्यासाठी सगळ्या वारकऱ्यांना उत्साह टिपला आहे. तिने या व्हिडिओला,"ल्यावर्षी यादिवशी आम्ही पंढरपूरात होतो. आणि त्या माऊलीने इतक्या सहज आम्हाला त्याचं दर्शन होऊ दिलं नाही. पण ते म्हणतात ना, “तुम्ही तेव्हाच त्याला भेटू शकाल जेव्हा तो तुम्हाला बोलावतो.” कुणाल आणि माझा अनुभव साधारण तसाच काहीसा होता. हरिनामाचा गजर करत, प्रदक्षिणा घालत, तो कळस पाहून जेव्हा दर्शन झालं तेव्हा मनात असलेले सगळे विचार ठप्प आणि मी शून्य झाले. राम कृष्ण हरी " असं कॅप्शन देत तिचा अनुभव शेअर केला.

अक्षयाने शेअर केलेल्या व्हिडीओमध्ये वारकऱ्यांचा आनंद, विठ्ठलाची प्रतिकृती घेण्यासाठी त्यांची सुरु असलेली धडपड, विठ्ठल मंदिराबाहेर सुरु असलेला विठ्ठलनामाचा गजर पाहायला मिळतोय. अक्षयाबरोबर कलर्स मराठीवरील अनेक कलाकारही या वेळी सहभागी झाले होते. तिच्या या व्हिडिओवर अनेकांनी कमेंट करत तिलाही आषाढी एकादशीच्या शुभेच्छा दिल्या आणि तिच्या पोस्टचं कौतुक केलं.

कलर्स मराठीवरील अक्षयाची 'सुंदरा मनामध्ये भरली' ही मालिका गाजली होती. या मालिकेत तिने समीर परांजपेबरोबर स्क्रीन शेअर केली होती. बॉडीशेमिंगवर भाष्य करणाऱ्या या मालिकेने सगळ्यांची मनं जिंकली होती.