Soni Razdan: बॉलिवूडमधील प्रसिद्ध अभिनेत्री आलिया भट्टची (Alia Bhatt) आई सोनी राजदान (Soni Razdan) यांच्यासोबत फसवणुकीचा प्रयत्न झाला आहे. याबाबत सोनी राजदान यांनी नुकतीच एक पोस्ट शेअर केली आहे. या पोस्टमध्ये सोनी राजदान यांनी त्यांच्यासोबत झालेल्या फसवणुकीच्या प्रयत्नाबद्दल सांगून चाहत्यांना सावध राहण्यास सांगितलं आहे.

सोनी राजदान यांची पोस्ट

सोनी राजदान यांनी इन्स्टाग्रामवर शेअर केलेल्या पोस्टमध्ये लिहिलं, "आपल्या आजूबाजूला खूप मोठा घोटाळा सुरू आहे. कोणीतरी मला फोन केला आणि सांगितले की, ते दिल्ली कस्टम्समधून बोलत आहेत. त्यांनी मला सांगितले की, मी काही बेकायदेशीर ड्रग्स ऑर्डर केले होते. फोन केलेल्या व्यक्तीनं सांगितलं की, तो देखील पोलिसांचाच आहे. त्याने मला माझा आधार कार्ड क्रमांक विचारला. ज्याप्रमाणे मला हा कॉल आला होता, त्याचप्रमाणे माझ्या ओळखीच्या इतर काही लोकांनाही कॉल आला आहे."

त्यांनी पुढे पोस्टमध्ये लिहिलं, "हे लोक फोन करून तुम्हाला घाबरवतात, धमक्या देतात. ते तुमच्याकडून मोठी रक्कम घेण्याचा प्रयत्न करतात. तुम्ही लोक त्यांच्या बोलण्यात अडकू नका किंवा त्यांच्या बोलण्याने प्रभावित होऊ नका. मी त्या लोकांना आधार कार्ड नंबर सांगितला नाही आणि फोन ठेवला,त्यांचा मला पुन्हा फोन आला नाही."

सोनी राजदान यांनी त्या पोस्टला कॅप्शन दिलं, "जेव्हा तुम्हाला अशा स्वरूपाचा कॉल येतो आणि तो खरा कॉल आहे असे वाटते तेव्हा तु्म्ही गोंधळू शकता. मला तो कॉल जवळजवळ खरा वाटला होता. जेव्हा मी याबाबत कोणाशी बोलले तेव्हा त्यांनी मला सांगितले की, हा एक घोटाळा आहे. त्यामुळे सावधान. हा एक घोटाळा आहे."

सोनी राजदान यांनी सोशल मीडियावर शेअर केलेल्या पोस्टमध्ये मुंबई पोलिसांना टॅग केलं आहे.