Salman Khan: बॉलिवूडमधील प्रसिद्ध अभिनेता सलमान खानच्या (Salman Khan) घराबाहेर काही दिवसांपूर्वी गोळीबार झाला. या घटनेतील दोन आरोपींना पोलिसांनी अटक केली आहे. अशाताच आता या संपूर्ण प्रकरणाबद्दल सलमान खानचा भाऊ आणि अभिनेता अरबाज खाननं एक पोस्ट शेअर केली आहे. त्याच्या या पोस्टनं अनेकांचे लक्ष वेधले आहे.

अरबाजची पोस्ट

अरबाजनं इन्स्टाग्रामवर एक पोस्ट शेअर केली आहे. या पोस्टमध्ये त्यानं लिहिलं, "अलीकडेच सलीम खान कुटुंबियांच्या गॅलेक्सी अपार्टमेंटवर मोटारसायकलवरून आलेल्या दोन अज्ञात व्यक्तींनी गोळीबार केल्याची घटना घडली. ही घटना अतिशय अस्वस्थ करणारी आहे. या धक्कादायक घटनेने आमचे कुटुंब हादरले आहे. दुर्दैवाने आमच्या कुटुंबाच्या जवळ असल्याचा दावा करणारे आणि प्रवक्ते असल्याचे भासवणारे काही लोक मीडियासमोर बिनधास्त विधाने करत आहेत की, हा सगळा पब्लिसिटी स्टंट आहे आणि आमच्या कुटुंबावर याचा काहीही परिणाम होत नाहीये, जे की खरे नाहीये.त्यांची ही मते गांभीर्याने घेतली जाऊ नयेत."

"सलीम खान कुटुंबातील कोणत्याही सदस्याने या घटनेबाबत मीडियासमोर कोणतेही वक्तव्य केलेले नाही. यावेळी या अनुचित घटनेच्या तपासात कुटुंबीय पोलिसांना मदत आणि सहकार्य करत आहेत. आमचा मुंबई पोलिसांवर विश्वास आहे आणि आमच्या कुटुंबाचे रक्षण आणि सुरक्षिततेसाठी ते त्यांच्या क्षमतेनुसार सर्व काही करतील, असे आश्वासन दिले आहे. तुमच्या प्रेम आणि पाठिंब्याबद्दल सर्वांचे आभार.", असंही अरबाजनं पोस्टमध्ये लिहिलं आहे.

सलमान खानच्या वांद्रे येथील गॅलेक्सी अपार्टमेंटबाहेर पहाटे 5 वाजेच्या सुमारास दोन व्यक्तींनी गोळीबार केला. या घटनेचं सीसीटीव्ही फुटेज समोर आलं. त्यानंतर पोलिसांनी या घटनेतील दोन आरोपींना गुजरातच्या भुजमधून अटक केली.

सलमानचे चित्रपट

सलमाननं त्याच्या सिकंदर या आगामी चित्रपटाची काही दिवसांपूर्वी घोषणा केली. तसेच त्याचे किक 2, पठाण वर्सेज टायगर हे देखील प्रेक्षकांच्या भेटीला येणार आहेत. सलमानच्या या चित्रपटांची प्रेक्षक उत्सुकतेने वाट बघत आहेत.