नवी दिल्ली- अभिनेत्री पूनम पांडे आणि वाद हे जवळपास एक समीकरणच झालं आहे. काही दिवसांपूर्वी पूनमने आपल्या मृत्यूची बातमी पसरवली होती. त्यानंतर ती खोटी असल्याचं तिनेच समोर येऊन सांगितलं. यावरुन तिच्यावर बरीच टीका देखील झाली. पण, याचा तिला जास्त फरक पडत नसल्याचं चित्र आहे. (Poonam Pandey Bathroom video leaked)

पूनम पांडे हिने Hauterrfly ला दिलेल्या मुलाखतीमध्ये बाथरुममधला लीक झालेल्या तिच्या जुन्या व्हिडिओ बद्दल माहिती दिली आहे. काही दिवसांपूर्वी पूनम पांडेचा बाथरुममधला व्हिडिओ लीक झाला होता. पूनमचा हा नवा पब्लिसिटी स्टंट असल्याचं त्यावेळी बोललं गेलं होतं. पण, पूनमने याबाबत खुलासा केला आहे. तिने म्हटलंय की, तिच्या एक्स बॉयफ्रेंडने हा व्हिडिओ लीक केला होता.

पूनम म्हणाली की, 'मला तो दिवस आजही आठवतो आणि त्या दिवसाला मी कधीही विसरु शकत नाही. आम्ही एकमेकांशी भांडलो होतो. मला त्याच्यापासून वाचायचं होतं. कारण, त्याने ट्रिमर हातात घेतलं होतं आणि तो माझे केस ट्रिम करणार होता. कसं तरी करून मी त्याच्या हातून ट्रिमर हिसकावला आणि खोलीच्या बाहेर पळाले. पण, माझा मोबाईल खोलीमध्येच राहिला होता.'

पूनमने सांगितलं की, ती घरी आली अन् तिने सर्व आपबीती आपल्या वडिलांना सांगितली. वडिलांनी त्याला फोन केला अन् याबाबत विचारणा केली. पूनमने सांगितलं की, एक्स बॉयफ्रेंडने तिचा व्हिडिओ लीक करण्याची धमकी दिली. त्याने वडिलांच्या फोनवरुन मला सांगितलं की, आताच्या आता तू परत ये. नाहीतर मी तुझा व्हिडिओ सोशल मीडियावर टाकेन. मी परत येणार नसल्याचं त्याला सांगितलं.

एक्स बॉयफ्रेंडने खरंच तो व्हिडिओ सोशल मीडियावर टाकला. मला वाटलं नव्हतं की तो असं काही करेल. मला वाटलं नव्हतं की तो इतक्या खालच्या पातळीला जाईल. पण, तो गेला, असं पूनम म्हणाली. ती पुढे म्हणाली की, या व्हिडिओमुळे माझं आयुष्य खराब झालं. सगळ्यात वाईट म्हणजे त्याने व्हिडिओ व्हायरल केल्यानंतर त्याचे मित्र त्याचं कौतुक करत होते.