Latest Marathi Entertainment News Updates: 'बिग बॉस मराठी ५' मध्ये या आठवड्यात फॅमिली वीक साजरा करत आहेत. आता हा कार्यक्रम संपायला फक्त काही दिवस बाकी आहेत. ६ ऑक्टोबर रोजी या कार्यक्रमाचा ग्रँड फिनाले पार पडणार आहे. या दिवशी 'बिग बॉस मराठी ५' चा विजेता जाहीर होणार आहे. त्यापूर्वी घरात फॅमिली वीक साजरा होतोय. घरात असलेल्या स्पर्धकांचे कुटुंबीय आता त्यांना भेटायला येत आहेत. यापूर्वी अभिजित सावंत, धनंजय पोवार यांचे कुटुंबीय घरात आले होते. आता अंकिता वालावलकर हिच्या कुटुंबीयांची घरात एंट्री झाली आहे. महत्वाचं म्हणजे तिचे बाबादेखील घरात येत आहेत. त्यांचा व्हिडिओ पाहून आता नेटकरीही भावुक झाले आहेत.

अंकिता आणि घरच्यांचा एक व्हिडिओ चॅनेलवर शेअर करण्यात आला आहे ज्यात अंकिताच्या बहिणी सगळ्यात आधी घरात येताना दिसतात. त्यांना पाहून अंकिताला रडू फुटतं. मात्र त्यानंतर पुन्हा एकदा बिग बॉस अंकिताला फ्रिज व्हायला सांगतात. तेव्हा मात्र घरात अंकिताचे वडील घरात एंट्री करतात. त्यांना पाहून अंकिताचा स्वतःच्या डोळ्यावर विश्वास बसत नाही. तिचे बाबा यापूर्वी कधीही मुंबईत आले नव्हते. अंकिताने त्यांना मुंबईत आणण्याचे खूप प्रयत्न केले होते. मात्र त्यांनी नेहमीच नकार दिला होता. आता मुलीसाठी ते मुंबईत आले. वडील घरात येताना अंकिता त्यांना बाबा म्हणून आर्त हाक मारते. जी ऐकून नेटकऱ्यांच्याही अंगावर शहारे आले आहेत.

नेटकरीही त्यावर आता प्रतिक्रिया देत आहेत. एका नेटकऱ्याने लिहिलं, 'बाबांना मुंबई मधे आणलस. तू जिंकलीस... हेच हवं होत आम्हाला. हेच बघायचं होतं'. आणखी एकाने लिहिलं, 'एक मालवणी पोरिक असा आपल्या बाबांना मोठ्या पडद्यावर वर आणला हीच मोठी गोष्ट असा आम्हा मालवणी लोकांना साठी. गो जिंकलास पोरी.' दुसऱ्याने लिहिलं, 'अंकिता तुझ्यासारखी मुलगी प्रत्येकाला मिळो. तुझे संस्कार बघून डोळ्यात पाणी येतं गं. खूप प्रामाणिक खेळली. अशीच प्रामाणिक राहा आयुष्यात.' आणखी एकाने लिहिलं, 'श्रमलेल्या बापासाठी, लेक नारळाचं पाणी; लढणाऱ्या लेकीसाठी, बाप बुलंद कहाणी.'