'बिग बॉस मराठी ५' सुरू झाल्यापासून सोशल मीडियावर या कार्यक्रमाची एकच चर्चा होती. आता अखेर कार्यक्रमाचे शेवटचे काही तास उरले आहेत. उद्या ६ ऑक्टोबर रोजी या कार्यक्रमाचा ग्रँड फिनाले पार पडणार आहे. संध्याकाळी ६ वाजता हा फिनाले पार पडणार आहे. त्यापूर्वी वाहिनीकडून एक खास गोष्ट करण्यात आली आहे. आज घरातून बाहेर गेलेले सदस्य पुन्हा एकदा आपल्या मित्रमैत्रिणींना भेटायला घरात येणार आहेत. अरबाज तर अगदी धावतच येऊन निक्कीला उचलून घेतो. हा प्रोमो पाहून नेटकरी आपापल्या प्रतिक्रिया देत आहेत. मात्र या प्रतिक्रियांमध्ये नेटकरी तिच्याबद्दलही चौकशी करत आहेत. घरात सगळे सदस्य परत आले असताना ती मात्र प्रोमोमध्ये दिसत नाहीये. ती स्पर्धक आहे आर्या जाधव.

कलर्स वाहिनीने शेअर केलेला प्रोमो पाहून नेटकरी आता आर्या बद्दल विचारणा करत आहेत. या प्रोमोमध्ये जवळपास सगळेच स्पर्धक दिसत आहेत. योगिता चव्हाण, निखिल दामले, पुरुषोत्तम दादा पाटील, वर्षा उसगावकर, संग्राम जाधव सगळेच दिसत आहेत. मात्र आर्या या प्रोमोमध्ये कुठेही दिसत नाहीये. त्यामुळे नेटकरी आता तिच्याबद्दल विचारणा करत आहे. तिला बोलावलं का नाही, असा प्रश्न आता चाहते विचारत आहेत. तर आर्याने दिलेल्या मुलाखतीत तिने मी पुन्हा कधीही 'बिग बॉस मध्ये पाय ठेवणार नाही असं म्हंटलं होतं. तर तिच्या वडिलांनीही माझ्या मुलीवर निक्कीची सावलीही पडायला नको असं सांगितलं होतं. त्यामुळे आता आर्या स्वतःहून आली नाही असंही काही नेटकरी सांगत आहेत.

याचा अर्थ आर्या बिग बीसच्या ग्रँड फिनालेला देखील असण्याची शक्यता कमी आहे. बिग बॉस मराठीच्या या पर्वात वर्षा उसगांवकर, निखिल दामले, अंकिता प्रभू वालावलकर, पंढरीनाथ कांबळे, योगिता चव्हाण, जान्हवी किल्लेकर, अभिजीत सावंत, घन:श्याम दरोडे, इरिना रुडाकोव्हा, निक्की तांबोळी, अरबाज पटेल, वैभव चव्हाण, आर्या जाधव, पुरुषोत्तम दादा पाटील, धनंजय पोवार आणि सूरज चव्हाण हे १६ स्पर्धक सहभागी झाले होते. तर संग्राम जाधव याची वाइल्ड कार्ड म्हणून एंट्री झाली होती.