छोट्या पडद्यावरील लोकप्रिय कार्यक्रम 'बिग बॉस मराठी ५' मध्ये दररोज नवनवे ट्विस्ट येत आहेत. या घरात प्रत्येकजण ती बिग बॉसची ट्रॉफी जिंकायला आला आहे. घरात यावेळेस वेगवेगळ्या क्षेत्रातील माणसं आली. काही कलाकार तर काही कीर्तनकार आणि त्यांच्यासोबतीला कन्टेन्ट क्रिएटर. हा खेळ समजून घेणं तसं अवघडच आहे. एकमेकांच्या डोक्यावर पाय देत पुढे जाणं प्रत्येकालाच जमतं असं नाही. काही माणसं ही मुळातच हळवी असतात. असाच एक हळवा माणूस या घरात गेलाय ज्याला छक्के पंजे जमत नाहीत. तो म्हणजे गुलीगत धोका फेम सुरज चव्हाण. त्याचा एक नवा प्रोमो सोशल मीडियावर व्हायरल होतोय जो पाहून नेटकरीही भावुक झाले आहेत.

वाहिनीच्या इंस्टाग्राम पेजवर एक व्हिडिओ शेअर करण्यात आला आहे. ज्यात सुरज कचरा काढताना दिसत आहे. आणि त्याला असं पाहून पंढरीनाथ कांबळे आणि अंकिता वालावलकर भावुक झाले आहेत. या व्हिडिओमध्ये सूरज त्याला दिलेली आठवड्याची ड्युटी करताना दिसतोय. त्याला बाहेरचा कचरा काढण्याचं काम दिलं आहे. तो कचरा काढत असताना अंकिता म्हणते याला असं बघून मला कसं तरी वाटतंय. त्यावर पॅडी म्हणतो, एरवी पण बिचारा तेच काम करत असणार बाहेर. तो काल मला म्हणाला, दादा मला लय वाईट वाटतं तुम्ही खाली झोपता आणि मी वर बेडवर झोपतो. त्यावर अंकिता म्हणते भले त्याला गेम नाही कळला पण त्याला माणसं कळली. त्यांचा हा व्हिडिओ सोशल मीडियावर प्रचंड व्हायरल होतोय.

यावर नेटकरीही सूरजची बाजू घेत आहेत. त्याच्यावर प्रेमाचा वर्षाव करत आहेत. तो खूप साधा आहे. तुम्ही कुणीही त्याला नॉमिनेट केलं तरी आम्ही त्याला घरातून बाहेर येऊ देणार नाही असं ते म्हणत आहेत. सूरजला खोटं वागता येत नाही म्हणून तो लाखोंच्या मनावर राज्य करतोय. हा व्हिडिओ पाहून अक्षरश अंगावर काटा आला, खूप माणुसकी आहे सुरज मध्ये, सुरज तू पूर्ण महाराष्ट्राचं मन जिंकलं, तुझ्यामुळे जे बिग बॉस पाहत नव्हते ते बिग बॉस पाहायला लागले अशा अनेक प्रतिक्रिया नेटकऱ्यांनी दिल्या आहेत.