Tv Enetertainment News : आपल्या धडाकेबाज अंदाजाने सगळ्या गुन्हेगारांना घाम फोडणारी चंद्रमुखी चौटाला आठवते का ? एफ आय आर या सब टेलिव्हिजनवरील लोकप्रिय मालिकेतून घराघरात पोहोचलेल्या या भूमिकेने सगळ्यांना वेड लावलं होतं. ही भूमिका साकारली होती अभिनेत्री कविता कौशिकने. पण सगळेजण तिला तिच्या खऱ्या नावापेक्षा चंद्रमुखी चौटाला म्हणूनच ओळखायचे. गेल्या दोन वर्षांपासून कविताने मालिकांपासून दूर राहणंच पसंत केलंय. सगळ्यांची लाडकी चंद्रमुखी सध्या काय करते जाणून घेऊया.

कविता कौशिकने नुकतीच टाईम्स नाऊ या चॅनेलला मुलाखत दिली. यावेळी तिने ती सध्या तिच्या नवऱ्याबरोबर पहाडांमध्ये राहत असून ती योग प्रशिक्षण देते. तसेच तिचा स्वतःचा एक आयुर्वेद औषधींसंबंधी ब्रँड असून हा बिझनेस ती तिच्या नवऱ्याच्या मदतीने चालवतेय. गेल्या काही काळात तिने पंजाबी सिनेमांमध्ये काम केलं आहे पण मालिकांपासून ती दूरच राहिलीये.

टाईम्स नाऊला दिलेल्या मुलाखतीमध्ये तिने मालिका क्षेत्र सोडण्याचं तिचं कारण सांगितलं. ती म्हणाली,"मला टेलिव्हिजनवर आता काम करायचंच नाहीये. मी ३० दिवस काम नाही करू शकत. मला वेब शो आणि सिनेमांमध्ये काम करण्याची इच्छा आहे पण मी ती टिपिकल हिरोईन नाहीये जिला कोणत्याही सिनेमांमध्ये लगेच काम मिळेल. काही विशिष्ट प्रकारच्या भूमिकाच माझ्या व्यक्तिमत्त्वाला शोभून दिसतात. शैतानी रस्मे वगैरे नावाच्या प्रोजेक्टच्या ऑफर्स मला अजूनही येतात. पण आता मला मी तीन वर्षांपूर्वी जसं आयुष्य जगत होते तसं जगायचं नाहीये जेव्हा मी पूर्णवेळ टेलिव्हिजनसाठी काम करत होते. मी त्या काळासाठी कायम कृतज्ञ आहे पण त्यावेळी तरुण होते आणि मला पैशांची गरज होती. पण आता मला माझा वेळ तसा घालवायचा नाहीये. खरंतर एफआयआरचं शूटिंग फार काळ नसायचं तरीही मला त्रास व्हायचा."

कविताने रोनित बिस्वासशी लग्न केलं आहे. सोशल मीडियावर ती तिच्या आताच्या आयुष्यचं अपडेट्स शेअर करत असते. २०२२ साली तिने मॅडम सर या मालिकेत पाहुणी कलाकार म्हणून एंट्री घेत चंद्रमुखी चौटालाची भूमिका साकारली होती. पण त्यानंतर ती प्रेक्षकांच्या भेटीस आली नाही.