दक्षिणात्य चित्रपटांतील प्रसिद्ध गायिका चिन्मयी श्रीपदाने पद्मश्रीसह अनेक मोठे पुरस्कार जिंकणाऱ्या गीतकारावर गंभीर आरोप केले असून. तिच्यासह तीन महिलांचा छळ या गीतकाराने केल्याचा आरोप चिन्मयीने केला आहे.

चिन्मयीने नुकतीच एक्सवर एक पोस्ट शेअर केली आहे. यामध्ये तिने एका गीतकारावर गंभीर आरोप केले आहेत. चिन्मयीने छळ करणाऱ्या गीतकाराचे नाव वैरामुथु असल्याचे आपल्या पोस्टमध्ये सांगितले आहे.

चिन्मयी श्रीपदाने दाक्षिण्यात चित्रपटांसह हिंदी आणि मराठी चित्रपटांमध्ये गाणी गायली आहेत. सैराट चित्रपटातील 'सैराट झालं जी' हे गीत प्रेक्षकांनी डोक्यावर घेतले होते.

एक्स पोस्टमध्ये काय म्हणाली चिन्मयी

एक गीतकार, पद्म पुरस्कार विजेता, संगीत नाटक अकादमी विजेता आणि अनेक राष्ट्रीय पुरस्कार विजेत्या व्यक्तीने माझा छळ केला आहे. मीडियासमोर माझ्यासह 3 महिलांनी त्याचे नाव घेतले आहे. मी गेल्या सहा वर्षांपासून हे सांगत आहे तरीही त्याला व्यासपीठ मिळत असून, तामिळनाडूतील प्रमुख राजकीय पक्षांनी त्यांना संरक्षण दिले आहे. मी अनेकांना, वैरामुथू यांनी माझा विनयभंग केल्याचे सांगितले आहे."

कोण आहे चिन्मयी श्रीपदा?

सुप्रसिद्ध पार्श्वगायिकांच्या यादीत चिन्मयी श्रीपदाच्या नावाचा समावेश आहे. चिन्मयी बहुतेकदा दक्षिण भारतीय चित्रपट सृष्टीत सक्रिय असते. मात्र, सध्या चिन्मयीने तिच्या करिअरमधून ब्रेक घेतला आहे.

चिन्मयीने हिंदी आणि मराठी चित्रपटांमध्येही पार्श्वगायिकेची भूमिका बजावली आहे. तिने गायलेल्या सुप्रसिद्ध गीतांमध्ये सैराट झालं जी, चेन्नई एक्सप्रेसमधील तितली, गीता गोविंदममधील येंते येंते या गाण्यांचा समावेश आहे.

कोण आहेत वैरामुथु रामासामी?

वैरामुथु रामासामी हे तमिळ कवी, गीतकार आणि लेखक आहेत. वैरामुथु हे प्रामुख्याने तमिळ सिनेमातील त्यांच्या कामासाठी ओळखले जातात. कल्लिकट्टू इथिकसम, करुवाची कविम, मुंदरम उलागापोर आणि इतर अनेक कलाकृती त्यांच्या नावावर आहेत.

वैरामुथु यांनी काही परदेशी कवींची आणि त्यांच्या कलाकृतींचा तमिळ भाषेतील एला नदियिलम एन ओदुममध्ये परिचय करून दिला आहे. त्यांच्या काही कलाकृतींचे तेलुगू, कन्नड आणि मल्याळममध्ये भाषांतर झाले आहे. त्यांची शेकडो गाणी हिंदीत अनुवादित झाली आहेत.

वैरामुथु यांना त्यांच्या 'कल्लीकट्टू इथिकसम' या कादंबरीसाठी पद्मभूषण, पद्मश्री आणि साहित्य अकादमी पुरस्कारांसह विविध पुरस्कारांनीही गौरविण्यात आले आहे. वैरामुथु हे आठ वेळा राष्ट्रीय चित्रपट पुरस्कार विजेते आहेत.