Gurmeet Chaudhary: अभिनेता गुरमीत चौधरी (Gurmeet Chaudhary) सध्या त्याच्या आगामी कमांडर करण सक्सेना (Commander Karan Saxena) या वेबसिरीजमुळे चर्चेत आहे. अक्शन आणि थ्रिलर प्रकारातील ही वेबसिरीज सध्या व्हायरल झालेल्या बिहाइंड द सीनमुळे चर्चेत असून जुलै २०२४ मध्ये ही वेबसिरीज प्रेक्षकांच्या भेटीस येणार आहे. नुकतंच या वेबसिरीजची रिलीज डेट सोशल मीडियावर जाहीर करण्यात आली.

रिलीज डेट जाहीर

बहुप्रतीक्षित कमांडर करण सक्सेना या वेबसीरिजची रिलीज डेट नुकतीच हॉट स्टारने एक्स या सोशल मीडिया प्लॅटफॉर्मवर जाहीर केली. 'टीम इंडियासाठी कमांडर करण सक्सेना येतोय' असं कॅप्शन देत ८ जुलैला ही वेबसिरीज रिलीज होणार असल्याचं जाहीर करण्यात आलं. डिझने प्लस हॉटस्टार या ओटीटी प्लॅटफॉर्मवर ही वेबसिरीज रिलीज होणार आहे.

वेबसीरिजची कास्ट

या वेबसिरीजमध्ये गुरमीत चौधरी बरोबर मराठी अभिनेत्री ऋता दुर्गुळे स्क्रीन शेअर करणार आहे. ऋताचा हा पहिला हिंदी प्रोजेक्ट असून या प्रोजेक्टद्वारे ती हिंदी वेबविश्वात पदार्पण करतेय. ती या वेबसिरीजमध्ये पोलीस अधिकाऱ्याची भूमिका साकारणार असल्याचं म्हंटलं जातंय. या व्यतिरिक्त अभिनेता इकबाल खान, अमित बहल, कृष्णा बिश्त, जतीन वागळे यांच्या मुख्य भूमिका आहेत.

सिरीजचं कथानक

या वेब सिरींजची कथा रॉ चा एजंट कमांडर करण सक्सेनाभोवती फिरते. पाकिस्तानी सैन्याने भारतातील सामान्य लोक आणि सैन्य यांच्यावर हल्ला करण्याचं आव्हान दिल्यावर करण हे आव्हान कसं मोडून काढतो आणि त्यासाठी त्याला किती संकटांचा सामना करावा लागतो याची गोष्ट या सिरीजमध्ये पाहायला मिळणार आहे. पाकिस्तान आणि भारतातील वादावर ही देशभक्तीपर सिरीज आधारित असून या सिरीजमध्ये अनेक समस्यांवर भाष्य करण्यात येणार आहे.

'या' पुस्तकावर आधारित वेबसिरीज

अमित खान यांच्या कमांडर करण सक्सेना या पुस्तकावर ही वेबसिरीज आधारित असून जतीन वागळे यांनी या सिरीजचं दिग्दर्शन केलं आहे तर कृष्णन अय्यर आणि राजेश्वरी नायर यांनी या वेबसिरीजची निर्मिती केली आहे.