अभिनेता सलमान खान याच्या घराबाहेर झालेल्या गोळीबाराच्या घटनेनंतर एकच खळबळ उडाली. त्यानंतर मोठा बंदोबस्त देखील तैनात करण्यात आला. दरम्यान या गोळीबाराची जबाबदारी एका व्यक्तीने स्वीकारली आहे. एका फेसबुक अकाऊंटवरील पोस्टद्वारे या गोळीबाराची सलमान खानच्या घराबाहेर गोळीबाराची जबाबदारी स्वीकारली असून यामध्ये बिश्नोई गँगचा हात असल्याचा दावा केला आहे. अनमोल बिश्नोई नावाच्या व्यक्तीने आपण या गोळीबारामागे असल्याचं मान्य केलं आहे.

अभिनेता सलमान खानच्या घराबाहेर गोळीबार

अभिनेता सलमान खान याच्या वांद्रे येथिल घराबाहेर आज पहाटे दोन अज्ञातांनी गोळीबार केला. त्यानंतर हे दोन्ही आरोपी फरार झाले आहे.पोलिसांनी दिलेल्या माहितीनुसार बॉलीवूड अभिनेता सलमान खानच्या मुंबईतील वांद्रे येथिल घराबाहेर आज पहाटे गोळीबाराचा आवाज आला, असे पोलिसांनी सांगितले. आज पहाटे 5 वाजता मोटारसायकलवरून आलेल्या अज्ञात व्यक्तींनी हवेत अनेक राऊंड गोळीबार करून घटनास्थळावरून पळ काढला. मुंबई पोलिसांनी या घटनेचा तपास सुरू केला असून, गोळीबार करणाऱ्या व्यक्तीचा शोध घेण्याचा प्रयत्न करत आहेत.

सीसीटीव्ही फुटेज आलं समोर

मुंबई (Mumbai) पोलीस सध्या या घटनेचा तपास करत आहेत. अशातच आता या घटनेचं सीसीटीव्ही फुटेज समोर आलं आहे. या फुटेजमध्ये दोन बाईकस्वार दिसत आहेत.सलमान खानच्या वांद्रेतील गॅलेक्सी अपार्टमेंटबाहेर पहाटे 5 वाजेच्या सुमारास दोन व्यक्तींनी अंदाधुंद गोळीबार केला. याचं सीसीटीव्ही फुटेज समोर आलं आहे. या फुटेजमध्ये दोन बाईकस्वार दिसत आहेत, आता मुंबई पोलीस या सर्व घटनेचा तपास करत आहेत.

मुख्यमंत्र्यांचा सलमानला फोन

गोळीबारानंतर मुख्यमंत्री एकनाथ शिंदे यांनी सलमान खानला फोन करुन धीर दिला.तुमच्या घराबाहेरील सुरक्षेत वाढ केली जाईल, असं मुख्यमंत्री एकनाथ शिंदेंनी सलमानला सांगितलं आहे. मुख्यमंत्री एकनाथ शिंदे यांनी मुंबई पोलीस आयुक्तांशी चर्चा करून सलमान खानची सुरक्षा वाढवण्याची सूचना दिली आहे. फॉरेन्सिक टीमही घटनास्थळी हजर झाली आहे. तसेच सलमानच्या घराबाहेर सुरक्षा वाढवण्यात आली आहे.

बिश्नोई गँगने स्वीकारली जबाबदारी

या गोळीबार प्रकरणात बिश्नोई गँगचा हात असल्याचा संशय तपास यंत्रणांनी व्यक्त केला होता. यामुळे या प्रकरणाचा तपास एटीएसकडे देण्यात आला आहे. दरम्यान, अनमोल बिश्नोई नावाच्या अकाऊंटवरून या गोळीबाराची जबाबदारी स्वीकारली आहे. मात्र हे अकाउंट फेसबुक वर सर्च केलं जाऊ शकत नाही. अकाउंटबाबत रिस्ट्रीक्शन्स आहेत. पोलीस याची सत्यता पडताळून पाहत आहेत.