या दिवाळीत मोठ्या पडद्यावर दोन मोठ्या चित्रपटांची लढत होणार आहे. एकीकडे रोहित शेट्टी दिग्दर्शित मल्टीस्टारर 'सिंघम अगेन' आहे. तर दुसरीकडे अनीस बज्मी दिग्दर्शित 'भूल भुलैया ३' आहे. या चित्रपटात कार्तिक आर्यन, विद्या बालन, तृप्ती डिमरी, माधुरी दीक्षित यांसारखे सेलिब्रिटी आहेत. 'भूल भुलैया'च्या या स्टार्सपैकी कोणाला किती फी मिळाली ते जाणून घेऊया.

रिपोर्ट्सनुसार हा चित्रपट जवळपास 150 कोटींच्या बजेटमध्ये बनवण्यात आला आहे. या चित्रपटात 'भूल भुलैया 2' फेम अभिनेता कार्तिक आर्यन पुन्हा एकदा तिसऱ्या भागात रूह बाबाच्या भूमिकेत दिसणार आहे. या चित्रपटासाठी कार्तिक आर्यनला किती फी मिळाली याची आता चर्चा रंगली आहे. या चित्रपटासाठी कार्तिक आर्यनने त्याची फी वाढवली असल्याचं सांगण्यात येत आहे. या चित्रपटासाठी कार्तिकने सर्वाधिक फी घेतली आहे. म्हणजे विद्या बालन, माधुरी आणि तृप्ती डिमरी यांची फी जरी एकत्र केली तरी ती कार्तिकच्या फीएवढी नाही.

शेवटच्या चित्रपटात फक्त 15 कोटी

'जागरण'च्या रिपोर्टनुसार, कार्तिकने रूह बाबाच्या भूमिकेसाठी सुमारे 48-50 कोटी रुपये फी घेतली आहे. 'भूल भुलैया 2'साठी कार्तिक आर्यनने जवळपास 15 कोटी रुपये फी घेतल्याची माहिती आहे. या चित्रपटाच्या पहिल्या भागात मंजुलिकाची भूमिका साकारणारी विद्या बालन पुन्हा एकदा 'भूल भुलैया 3'मध्ये त्याच व्यक्तिरेखेत दिसणार आहे. या भुताच्या भूमिकेसाठी विद्याला सुमारे 8 ते 10 कोटी रुपये मिळाले असल्याचं सांगण्यात येतंय.

तृप्ती डिमरीला सगळ्यात कमी मानधन

'भूल भुलैया 3'मध्ये माधुरी दीक्षितही मंजुलिकाच्या भूमिकेत दिसणार आहे. या भूमिकेसाठी तिला सुमारे 5 ते 8 कोटी रुपये मानधन मिळाल्याचं वृत्त आहे. या चित्रपटात कार्तिक आर्यनच्या प्रेमात पडलेल्या तृप्ती डिमरीला तिच्या भूमिकेसाठी फक्त 80 लाख रुपये मानधन मिळालं आहे. 'ॲनिमल' नंतर तृप्ती डिमरी अनेक बॉलिवूड चित्रपटांमध्ये दिसली आहे.

'भूल भुलैया 3' दिवाळीच्या मुहूर्तावर 1 नोव्हेंबरला प्रदर्शित होत आहे. हा चित्रपट रोहित शेट्टीच्या 'सिंघम अगेन'ला टक्कर देणार आहे. 'भूल भुलैया 3'चा ट्रेलर लोकांना अधिक आवडला होता. हा चित्रपट रोहित शेट्टीच्या चित्रपटाला तगडी टक्कर देईल अशी अपेक्षा आहे.