२०१६ साली मोठ्या पडद्यावर प्रदर्शित झालेल्या 'दंगल' या चित्रपटाने बॉक्स ऑफिसवर धुमाकूळ घातला होता. या चित्रपटात अमीर खान, साक्षी तन्वर, फातिमा सना शेख हे कलाकार मुख्य भूमिकेत होते. या चित्रपटाने तब्बल २००० कोटींची कमाई केली होती. या चित्रपटाने बॉक्स ऑफिसवर इतिहास रचला होता. कुस्तीवर आधारित हा चित्रपट फोगाट कुटुंबावर बनला होता. मात्र यासाठी फोगाट कुटुंबाला किती पैसे मिळाले होते हे तुम्हाला ठाऊक आहे का? फोगाट कुटुंबातील बबिता फोगाट हिने याबद्दल सांगितलं आहे.

कोणाच्याही आयुष्यावर आधारित चित्रपट बनवताना त्यांची परवानगी घेणं आणि त्यांना त्यासाठी योग्य ते मानधन देणं गरजेचं असतं. फोगाट कुटुंबावर आधारित या चित्रपटासाठी त्यांना १ कोटी इतकं मानधन देण्यात आलं होतं. एका चॅनेलला दिलेल्या मुलाखतीत बबिताने ही गोष्ट सांगितली आहे. या चित्रपटासाठी आम्हाला १ कोटी रुपये मिळाले असं ती म्हणाली. त्यावर मुलाखतकाराने तिला ही किंमत कमी आहे याचं तुम्हाला वाईट वाटतं का असा प्रश्न विचारला. त्यावर बबिताने नाही म्हटलं. बबिता म्हणाली, 'माझे बाबा म्हणजेच महावीर फोगाट यांनी सांगितलंय की पैशांपेक्षा लोकांचं प्रेम आणि आदर मिळाला पाहिजे. तो जास्त महत्वाचा आहे.'

२३ डिसेंबर २०१६ रोजी प्रदर्शित झालेल्या दंगल या चित्रपटाचे दिग्दर्शन नितेश तिवारी यांनी केलं होतं. अभिनेता आमिर खानने बबिताचे वडील महावीर फोगाट यांची भूमिका साकारली होती. तसेच आमिर या चित्रपटाचा सहनिर्मितासुद्धा होता. या चित्रपटात महावीर हे आपल्या मुलींना गीता आणि बबिता यांना ऑलिम्पिक पर्यंत पोहोचण्यासाठी कसं प्रशिक्षण देतो ही गोष्ट दाखवण्यात आली होती.