Juhi Chawla Wedding: अभिनेत्री जुही चावला हिने कायमच आपलं वैयक्तिक आयुष्य गुलदस्त्यात ठेवलं. मात्र तिच्या चित्रपटांइतकीच तिच्या वैयक्तिक आयुष्याचीदेखील चर्चा झाली. जुहीने तिच्या कुटुंबातील सगळ्यांच्या मृत्यूचं दुःख सहन केलं. तिने २९ वर्षांपूर्वी बिजनेसमन जय मेहता यांच्याशी लग्नगाठ बांधली. तिच्या लग्नामुळे तिच्यावर कायम टीका होत आली असली तरी जय यांनी तिच्या पडत्या काळात तिला सांभाळलं. नैराश्यात गेलेल्या जुहीला त्यांनी पुन्हा जगण्याचं बळ दिलं. त्यांना दोन मुलंही आहेत. आता नुकत्याच दिलेल्या मुलाखतीत तिने तिच्या लग्नाचा एक किस्सा सांगितला आहे. तिच्या सासूबाईंनी अचानकच त्यांचं आलिशान लग्न कॅन्सल केलं होतं.

जुहीच्या सासूबाईंनी तिच्या लग्नात त्यांचं ठरलेलं महागडं लग्न रद्द करून घरच्याघरी लग्न लावण्याचा निर्णय घेतला होता. त्यांनी तब्बल २ हजार लोकांना फोन करत लग्नाला न येण्याबद्दल सांगितलं होतं. हे सगळं त्यांनी फक्त जुहीसाठी केलं होतं. जुहीने नुकतीच एक मुलाखत दिली. या मुलाखतीत बोलताना जुही म्हणाली, 'मी माझ्या करिअरच्या काही मोठ्या चित्रपटांमध्ये काम करत होती आणि माझं लग्न होणार होतं. माझ्या आईचं वर्षभरापूर्वी निधन झालं होतं. जेव्हा लग्नाची तारीख जवळ येत होती तेव्हा मी विचार करत होती की माझी आई तर गेली जी माझ्यावर सगळ्यात जास्त प्रेम करायची. आता माझं करिअरदेखील जाणार. मी खूप दुःखात होते.'

जुही पुढे म्हणाली, 'मला कळत नव्हतं मी कशी आनंदात राहू? एके दिवशी मला असह्य झालं आणि रडू लागले. मी माझ्या सासूबाईंना सांगितलं आणि त्या म्हणाल्या, ठीक आहे. त्यांनी सगळ्या कुटुंबाला लग्न मोठ्या प्रमाणात न करण्यासाठी समजावलं. आणि मी घरातल्या काही कुटुंबियांच्या उपस्थितीत लग्न केलं. माझ्या लग्नाला फक्त ८० ते ९० लोक उपस्थित होते. विचार करा की तुमच्या सासूबाईंनी आधीच पाठवलेली सगळी निमंत्रणं रद्द केली. त्यांनी जवळपास २ हजार लोकांना फोन करून लग्नाला न येण्याबद्दल सांगितलं.' जुही आणि जय यांची भेट निर्माते राकेश रोशन यांच्यामुळे झाली होती.