Juna Furniture Trailer Out: महेश मांजरेकर (Mahesh Manjrekar) आणि मेधा मांजरेकर (Medha Manjrekar) यांची मुख्य भूमिका असलेल्या जुनं फर्निचर (Juna Furniture) या सिनेमाचा ट्रेलर नुकताच प्रेक्षकांच्या भेटीस आला. वृद्ध आई- वडील आणि दुरावलेला मुलगा यांच्या नात्यावर भाष्य करणारा हा ट्रेलर सगळ्यांचं लक्ष वेधून घेतोय.

गोविंद पाठक हे वृद्ध गृहस्थ त्यांच्या मुलाने त्यांच्या पत्नीचा खून केलाय अशी तक्रार घेऊन पोलिस स्टेशनला येतात आणि परदेशात राहणाऱ्या त्यांच्या मुलाविरुद्ध केस उभी राहते. पत्नीच्या मृत्यूला गोविंद त्यांच्या मुलाला आणि सुनेला जबाबदार धरतात. मुलगा आणि वडिलांच्या या कोर्टातील लढाईवर हा सिनेमा आधारित आहे. आई-वडील मुलांप्रती असलेल्या कर्तव्यात कधीच कमतरता ठेवत नाहीत पण तीच मुले आई-वडील म्हातारे झाल्यावर त्यांच्याकडे दुर्लक्ष का करतात? त्यांना त्यांच्या कर्तव्याचा विसर का पडतो? हा प्रश्न सिनेमातून विचारला आहे.

ही आहे सिनेमाची कास्ट

महेश मांजरेकर, मेधा मांजरेकर, भूषण प्रधान, अनुषा दांडेकर, गिरीश ओक, सचिन खेडेकर, समीर धर्माधिकारी, शरद पोंक्षे यांच्या या सिनेमात मुख्य भूमिका आहेत. या सिनेमाचं लेखन, दिग्दर्शन महेश मांजरेकर यांनी केलं आहे.

दिमाखात पार पडला ट्रेलर लाँच सोहळा

या सिनेमाचा ट्रेलर लाँच सोहळा दिमाखात पार पडला. सिनेमाच्या संपूर्ण कास्ट आणि टीमने ट्रेलर लाँचला हजेरी लावली होती. गीतकार वैभव जोशी यांच्या 'सोबतीचा करार' या मैफिलीचं यावेळी आयोजन करण्यात आलं होतं. केतकी माटेगावकर, स्वप्नील बांदोडकर आणि पवनदीप राज या गायकांनी सुद्धा हजेरी लावत गाणी सादर केली. दिग्दर्शक महेश मांजरेकर यांनी 'काय चुकले सांग ना?' या गाण्याच्या काही ओळी सादर केल्या.

पाहा व्हिडीओ

२६ एप्रिल २०२४ ला हा सिनेमा सगळीकडे प्रदर्शित होणार असून सत्य-सई फिल्म्स आणि स्कायलिंकची प्रस्तुती असलेल्या या सिनेमाची निर्मिती यतीन जाधव यांनी केली आहे.या आधी महेश मांजरेकर यांचे पांघरूण, ही अनोखी गाठ हे सिनेमे प्रेक्षकांच्या भेटीस आले. त्यांचे हे सिनेमे सगळ्यांनाच खूप पसंत पडले.