Kangana Ranaut: हिमाचल प्रदेशातील मंडी येथून आगामी लोकसभा निवडणूक लढत असलेली अभिनेत्री कंगना रनौत (Kangana Ranaut) ही सध्या चर्चेत आहे. काँग्रेसच्या नेत्या सुप्रिया श्रीनेत आणि कंगनामध्ये सध्या मोठा वाद सुरु आहे. सुप्रिया श्रीनेत (Supriya Shrinate) यांच्या सोशल मीडिया अकाऊंटवर कंगनाबाबत अत्यंत आक्षेपार्ह पोस्ट शेअर केली. त्यानंतर कंगनानं त्या पोस्टला सडेतोड उत्तर दिलं. अशातच सुप्रिया श्रीनेत आणि कंगना यांच्या सोशल मीडियावरील वादादम्यान कंगनाचा एक जुना व्हिडीओ सोशल मीडियावर व्हायरल झाला आहे. या व्हिडीओनं अनेकांचे लक्ष वेधले आहे.

कंगनाचा जुना व्हिडीओ व्हायरल

कंगनाचा एक जुना व्हिडीओ दाऊद नदाफ यांच्या सोशल मीडिया अकाऊंटवरुन शेअर करण्यात आला आहे. या व्हिडीओमध्ये कंगना ही उर्मिला मातोंडकरला 'सॉफ्ट पॉर्न स्टार'म्हणताना दिसत आहे. व्हिडीओला कॅप्शन देण्यात आलं, "जेव्हा कोणीतरी सुप्रिया श्रीनेट जी यांचे खाते हॅक केले आणि त्याद्वारे कंगना रानौतबद्दल काही बोलले गेले तेव्हा संपूर्ण गोदी मीडियाने गोंधळ सुरू केला. पण काही दिवसांपूर्वी याच कंगना रानौतनं काँग्रेस नेत्या आणि अभिनेत्री उर्मिला मातोंडकर यांना ‘सॉफ्ट पॉर्न स्टार’ म्हटलं होतं. यावर कंगना रानौतला माफी मागायला सांगितली होती?"

सुप्रिया यांच्या अकाऊंटवरुन शेअर करण्यात आली आक्षेपार्ह पोस्ट

काँग्रेसच्या नेत्या सुप्रिया श्रीनेत यांच्या अकाऊंटवरुन कंगनाबाबत आक्षेपार्ह पोस्ट शेअर करण्यात आली होती. या पोस्टवर कंगनाने निशाणा साधला होता.

"प्रिय सुप्रिया जी, एक कलाकार म्हणून मी 20 वर्षांपासून काम करत आहे. या काळात मी विविध महिलांची भूमिका निभावली आहे. क्वीनमध्ये एका साध्या मुलीपासून धाकडमध्ये एक आकर्षक जासूज, तसेच मणिकर्णिकामध्ये एक देवी ते चंद्रमुखी चित्रपटात एका राक्षसाची भूमिका देखील मी केली आहे", अशी पोस्ट शेअर करुन कंगनानं सुप्रिया श्रीनेत यांना सडेतोड उत्तर दिलं. त्यानंतर या संपूर्ण प्रकरणावर सुप्रिया श्रीनेत यांनी स्पष्टीकरण दिलं. त्या म्हणाल्या, "माझ्या फेसबुक आणि इंस्टाग्राम अकाऊंटचा एक्सेस अनेकांकडे आहे. यातील एका व्यक्तीने आज अत्यंत घृणास्पद आणि आक्षेपार्ह पोस्ट टाकली होती. मला याची माहिती मिळताच मी ती पोस्ट काढून टाकली."