सध्या सोशल मीडियावर अनंत अंबानी आणि राधिका अंबानी यांच्या लग्नाची जोरदार चर्चा आहे. मुकेश अंबानी आणि नीता अंबानी यांनी आपल्या धाकट्या मुलाचा लग्नात कशाशीही कमी ठेवली नाहीये. या लग्नासाठी मोठमोठ्या पाहुण्यांना आमंत्रणं गेली आहेत. बड्या नेत्यांपासून सेलिब्रिटींपर्यंत ते पंतप्रधानांपासून ते मोठ्या कंपन्यांच्या सीईओपर्यंत अनेक जण या लग्नाला उपस्थित राहणार आहे. यातील काही पाहुणे आज १२ जुलै रोजी मुंबईत दाखल झाले. या पाहुण्यांपैकी एक म्हणजे लोकप्रिय हॉलिवूड स्टार किम कार्दशियन. तिने शेअर केलेल्या व्हिडिओने आता सगळ्यांचं लक्ष वेधून घेतलं आहे. अंबानींची ही पाहुणी मुंबईत चक्क रिक्षामधून फिरते आहे.

किम एक प्रसिद्ध हॉलिवूड अभिनेत्री आहे. तिने अनेक चित्रपटांमध्ये काम केलं आहे. तिचे सोशल मीडियावर कोट्यवधी फॉलोवर्स आहेत. ती स्वतःचा सौंदर्य प्रसाधनांचा ब्रँडदेखील आहे. ज्याची किंमत अब्जावधींमध्ये आहे. टाइम्स मॅगझीनच्या १०० प्रभावशाली व्यक्तींमध्ये तिचा समावेश आहे. आता किम सोशल मीडियावर चर्चेत आहे. भारतात येण्यापूर्वी तिने एक इच्छा व्यक्त केली होती. तिला मुंबईत आल्यावर मुंबईच्या प्रसिद्ध ऑटोरिक्षामध्ये बसून फोटोशूट करायचं होतं. यासाठी तिने जवळपास हट्टच धरला होता. ज्यासाठी प्रोडक्शन हाउसची पळापळ सुरू होती. आता किमची ही इच्छादेखील पूर्ण झाली आहे.

किमचं फोटोशूट लालबाग परळ, सिध्दीविनायक मंदिर या ठिकाणी होणार होतं. हे शूट होईल की नाही ठाऊक नाही मात्र त्यापूर्वी किमने तिची रिक्षातून फिरण्याची इच्छा पूर्ण करून घेतली आहे. तिने तिच्या बहिणीसोबतचा एक व्हिडिओ स्टोरीवर शेअर केला आहे. या व्हिडिओमध्ये किम आणि तिची बहीण क्लोई रिक्षात बसलेल्या दिसत आहेत. त्या दोघी ताज हॉटेलच्या इथे फेरफटका मारताना दिसत आहेत. किम आणि तिची बहीण रिक्षात बसून खूप आनंदी दिसत आहे. बहिणीच्या व्हिडिओसाठी किम पोज देताना दिसतेय. यासोबतच किमने तिचे इतरही फोटो स्टोरीवर शेअर केले आहेत. भारतात आल्यावर तिचं कशाप्रकारे स्वागत करण्यात आलं हे तिने दाखवलं आहे.