Kiran Mane Post : मराठी इंडस्ट्रीमधील कायम चर्चेत राहणारे अभिनेते आणि सामाजिक कार्यकर्ते किरण माने सोशल मीडियावरसुद्धा सक्रिय आहेत. ते कायमच आसपास घडणाऱ्या घटनांवर रोखठोक मतं मांडत असतात. याबरोबरच ते त्यांची राजकीय मतं सुद्धा सगळ्यांबरोबर शेअर करतात. पण किरण मानेंना अचानक रुग्णालयात दाखल करण्यात आलं. सोशल मीडियावर पोस्ट शेअर करत त्यांनी ही बातमी शेअर केली.

"काल दुपारपर्यंत फिट, तंदुरूस्त, हसतखेळत होतो...आज हाॅस्पीटल... सलाईन..इंजेक्शन्स आणि प्रचंड असह्य वेदना...आयुष्य किती अनप्रेडिक्टेबल असतं ! अर्थात, यावरही मात करून यातून बाहेर पडेन. फिकीर नाॅट." अशी पोस्ट शेअर करत किरण यांनी त्यांच्या आजारपणाची बातमी सोशल मीडियावर शेअर केली. मात्र त्यांच्या आजारपणाचं कारण मात्र अजून त्यांनी उघड केलं नाहीये. अनेकांनी त्यांच्या या पोस्टवर कमेंट करत त्यांना लवकर बरं होण्यासाठी शुभेच्छा दिल्या.

किरण माने सध्या सन मराठीवरील 'तिकळी' या मालिकेत काम करत आहेत. एका अंधश्रद्धेविरोधात एका मुलीने दिलेला लढा यावर या मालिकेची गोष्ट आधारित आहे. ते बिग बॉस मराठीच्या चौथ्या सीजनमध्येही सहभागी झाले होते. त्यांचा गेम बराच चर्चेत होता. त्या आधी त्यांनी मुलगी झाली हो या स्टार प्रवाहवरील मालिकेत काम केलं होतं पण सहकलाकारांबरोअबर झालेल्या वादामुळे त्यांना या मालिकेतून काढून टाकण्यात आलं. याबाबत किरण यांनी सोशल मीडियावर बऱ्याच पोस्ट शेअर केल्या होत्या. अखेर ती मालिका कमी टीआरपीमुळे बंद झाली.

किरण यांनी गेल्यावर्षी शिवसेना उद्धव बाळासाहेब ठाकरे या पक्षात प्रवेश केला. त्यांनी निवडणुकीतही शिवसेना पक्षाविषयी बराच प्रचार केला होता. उद्धव ठाकरेंनी स्वतः त्यांचं कौतूक केलं होतं.