Kishori Shahane Interview : बिग बॉस मराठी सीजन ५ हा खूप गाजतोय. पहिल्या आठवड्यातच या सिजनमधील वादविवाद चर्चेत राहिले आहेत. अभिनेत्री निकी तांबोळी आणि वर्षा उसगावकर यांचं पहिल्या दोन दिवसांतच जोरदार भांडण झालं. यावरून बऱ्याच चर्चा झाल्या. अनेकांनी निक्कीवर टीकाही केली. वर्षा यांच्या सहकलाकार आणि बिग बॉस मराठीच्या माजी स्पर्धक यांनी किशोरी शहाणे यांनी निकी आणि वर्षा यांची कानउघडणी केली आणि मोलाचा सल्ला दिला.

किशोरी शहाणे यांनी नुकतीच लोकमत फिल्मीला मुलाखत दिली. यावेळी किशोरी यांना यावेळी वर्षा आणि निक्कीचं जे भांडण झालं त्यावरून प्रश्न विचारण्यात आला. त्यावर किशोरी म्हणाल्या,"अपमान करायला नाही पाहिजे असं मला वाटतं. निक्कीसाठी हे चुकीचं आहे पण वर्षानेही आता खंबीरपणे उभं राहिलं पाहिजे, असं माझं मत आहे. तिने हललं नाही पाहिजे. या गोष्टी होणार. प्रत्येकाला शेवटी दुसऱ्याला बाहेर काढायचं आहे जिंकण्यासाठी. जिंकणार कसं नाहीतर! एकमेकांचा उदो उदो तुम्ही करत बसलात तर तुम्ही जिंकणार कसे. बिग बॉस हा एक individually खेळायचा गेम आहे. तो एक मानसिकरीत्या खेळण्याचा गेम आहे. ज्यांनी या खेळाचं व्यवस्थित निरीक्षण केलं आहे त्यांना या खेळाविषयी उत्सुकता निर्माण होईल. मी पण बिग बॉस गेमची आता फॅन झाली आहे. " असे विचार किशोरी यांनी मांडले.

किशोरी यांनी बिग बॉस मराठी सीजन २ मध्ये सहभाग घेतला. बिग बॉस मराठीच्या फायनल पर्यंत त्यांनी मजल मारली होती पण नंतर त्यानं एलिमिनेट झाल्या. कोणताही वाद न करता पण वेळोवेळी त्यांच्याविरुद्ध झालेल्या अन्यायावर आवाज उठवत किशोरी यांनी प्रेक्षकांचं मन जिंकलं. एक उत्तम स्पर्धक म्हणून त्यांचं कौतुक झालं होतं.