Zapatlela 3 movie update: मराठी इंडस्ट्रीतील ज्येष्ठ अभिनेते, दिग्दर्शक आणि निर्माते महेश कोठारे यांची दिवंगत अभिनेते लक्ष्मीकांत बेर्डे यांच्याशी असलेली मैत्री सर्वश्रुत आहे.

महेश कोठारे झपाटलेला ३ सिनेमाची निर्मिती करत आहेत आणि या सिनेमाच्या निमित्ताने सगळ्यांनाच अभिनेते लक्ष्मीकांत बेर्डे यांची आठवण आली. नुकतंच त्यांनी एका मुलाखतीमध्ये झपाटलेला ३ सिनेमासाठी लक्ष्मीकांत यांचं AI व्हर्जन तयार करण्याची इच्छा व्यक्त केली.

नुकतीच महेश यांनी लोकमत फिल्मीला मुलाखत दिली. यावेळी ते म्हणाले,"लक्ष्या माझा जिवलग मित्र होता आणि अजूनही आहे. तो आजही माझ्याबरोबर आहे आणि तो मला मार्गदर्शन करतो असं मला वाटतं. मला लक्ष्मीकांत बेर्डेबरोबर पुन्हा काम करायची इच्छा आहे. AI चा उपयोग करून मला लक्ष्मीकांत बेर्डेला पुन्हा क्रिएट करायचंय आणि ते मी करणारच. लक्ष्मीकांतला मी स्क्रीनवर आणणार आहे. महेश-लक्ष्या पुन्हा एकत्र दिसणार."

महेश यांच्या या वक्तव्यामुळे 'झपाटलेला ३' मध्ये लक्ष्मीकांत बेर्डे यांची झलक पाहायला मिळणार का? असा प्रश्न चाहत्यांना पडला होता. यावरही एका कार्यक्रमात महेश कोठारे यांनी उत्तर दिलं आहे.

'झपाटलेला ३' मध्ये लक्ष्मीकांत बेर्डे यांची झलक पाहायला मिळणार असून AI तंत्रज्ञानाच्या मदतीने लक्ष्मीकांत यांची भूमिका रिक्रिएट करण्याचा प्रयत्न महेश यांची टीम करणार आहे. या निमित्तानं मराठी सिनेमात पहिल्यांदाच AIचा वापर करण्यात येणार असल्याचं कळतंय.

'झपाटलेला ३' मध्ये तात्या विंचूचंही दिसणार AI रूप

झपाटलेला ३ या आगामी सिनेमात तात्या विंचूचंही AI रूप प्रेक्षकांना पाहायला मिळणार आहे. तांत्रिकदृष्ट्या हा सिनेमा आणखी सक्षम करण्याचे प्रयत्न सिनेमाची टीम करत आहे. चित्रपटाच्या अनुषंगाने काही तांत्रिक गोष्टीसाठी आपण ऑस्ट्रेलियाला जाणार असल्याचं महेश कोठारे यांनी काही दिवसांपूर्वी शिर्डीत पत्रकारांशी बोलताना सांगितलं.

हॉलिवूड सिनेमात झालाय AI चा प्रयोग

हॉलिवूडच्या गाजलेल्या 'फास्ट अँड फ्युरियस' सिनेमाच्या सातव्या भागात AI तंत्रज्ञानाचा वापर करत अभिनेता पॉल वॉकरला रिक्रिएट करण्यात आलं. या साठी पॉलच्या भावाने अभिनय केल्या होत्या आणि त्याच्या चेहऱ्यावर पॉलचे फोटो लावण्यात आले होते. 'फास्ट अँड फ्युरियस ७' रिलीज होण्यापूर्वी पॉलचा मृत्यू झाल्याने हा प्रयोग करण्यात आला होता.