गेल्या अनेक दिवसांपासून अनंत अंबानी आणि राधिका मर्चंट यांच्या लग्नाची सोशल मीडियावर जोरदार चर्चा होती. गेले चार दिवस या लग्नाचे अनेक विधी पाहायला मिळत होते. मेहंदी, हळद, शिवशक्ती पूजा, गृहपूजा असे अनेक कार्यक्रम मोठ्या थाटात पार पडले. १२ जुलै रोजी हे लग्न मोठ्या थाटामाटात पार पडलं. ना भूतो ना भविष्यती असा हा सोहळा झाला. बॉलिवूड कलाकारांपासून ते दाक्षिणात्य कलाकारांपर्यंत सगळ्यांनीच या सोहळ्याला उत्साहात हजेरी लावली. त्यातच अभिनेत्री अमृता खानविलकर हिनेदेखील या लग्नाला हजेरी लावली होती. मात्र तिच्या पाठोपाठ आणखी एका अभिनेत्रीचा व्हिडिओ सोशल मीडियावर व्हायरल होतोय जी मराठमोळ्या अंदाजात या लग्नाच्या रिसेप्शनला हजर झाली होती.

या लग्नासाठी हॉलिवूडच्या कलाकारांसह अनेक बड्या नेत्यांना देखील आमंत्रण देण्यात आलं होतं. बॉलिवूड कलाकार तर अनंतच्या वरातीत कल्ला करताना दिसले. या लग्नासाठी मराठी सिनेसृष्टीतून फार कमी कलाकारांना बोलवण्यात आलं होतं. त्यात अभिनेता श्रेयस राजे आणि अमृता खानविलकर हीचा समावेश होता. अमृताने गुलाबी शिमरी ड्रेसमध्ये या लग्नाला हजेरी लावली होती. तिच्या पाठोपाठ आणखी एका लोकप्रिय मराठी अभिनेत्रीने अनंत आणि राधिका यांच्या रिसेप्शनला हजेरी लावली. ही अभिनेत्री आहे 'जवान' फेम गिरीजा ओक. गिरीजा अगदी मराठमोळ्या लूकमध्ये या कार्यक्रमासाठी पोहोचली होती.

तिने जांभळ्या रंगाची जरीकाठाची पैठणी नेसली होती. तर केसातील फूल आणि गजरा तिच्या लूकला आणखीनच खुलवत होते. तिच्या या लूकचं नेटकरीही कौतुक करताना दिसत आहेत. तिचा एक व्हिडिओ सध्या सोशल मीडियावर व्हायरल होतोय. गिरिजाने मराठीसोबतच हिंदीमधील ‘द व्हॅसिन वॉर’, ‘तारे जमीन पर’, ‘शोर इन द सिटी’, ‘लज्जा’ अशा चित्रपटांमध्ये काम केलं आहे.