Munjya Movie Cast: दिग्दर्शक आदित्य सरपोतदार यांचा 'मुंज्या' हा चित्रपट सध्या बॉक्स ऑफिसवर धुमाकूळ घालतोय. या चित्रपटाने प्रेक्षकांना अक्षरशः वेड लावलंय. अस्सल कोकणातील आगळीवेगळी कथा, चित्रीकरण, मराठी कलाकार, संवाद या सगळ्यांमुळे प्रेक्षकांनी हा चित्रपट उचलून धरला. या सगळ्यात गाजतायत ते चित्रपटातील मराठी कलाकार. त्यातही चित्रपटातील मुंज्याची म्हणजेच बालकलाकाराची प्रेक्षकांमध्ये चर्चा आहे. मुंज्या म्हणजेच चित्रपटात गोट्याची भूमिका साकारणाऱ्या बालकलाकाराचं देखील खूप कौतुक होतंय. मात्र त्याला ही भूमिका नेमकी मिळाली कशी हे त्याने सकाळ डिजिटलला दिलेल्या मुलाखतीत सांगितलं आहे.

चित्रपटात गोट्या ही भूमिका साकारली आहे बालकलाकार आयुष उलागड्डे याने. या भूमिकेबद्दल सकाळशी बोलताना आयुष म्हणाला, 'कोल्हापुरात एक शिंदे अकॅडमी आहे तिथे मी अभिनय शिकायला जातो. त्यांच्याकडे या भूमिकेसाठी कुणी मुलगा आहे का अशी विचारणा झाली होती. त्यावर सरांनी सगळ्या मुलांची प्रोफाइल दिली होती. त्यातून त्यांना माझा चेहरा या भूमिकेसाठी योग्य वाटला आणि त्यांनी मला ऑडिशनसाठी बोलावलं. मी यासाठी तीनवेळा ऑडिशन पास केल्या. त्यानंतर माझी लूक टेस्ट करण्यात आली आणि माझं सिलेक्शन झालं. हे सगळं शूटिंग कोकणात झालं. पण तिथे जाताना मला थोडी भीती वाटत होती.'

पुढे बोलताना आयुष म्हणाला, 'तिथे सगळे होते. आई माझ्यासोबत शूटिंगला यायची. पण मी पहिलाच असा भुताचा चित्रपट करत होतो तर सुरुवातीला मला थोडी भीती वाटत होती. पण माझे आणि खुशीचे म्हणजे माझी जी बहीण दाखवलीये तिचे सेटवर खूप लाड व्हायचे. पहिल्याच दिवशी त्यांनी आम्हाला आमच्या नावाच्या बॉटल दिल्या होत्या ज्यावर माझं गोट्या असं नाव होतं आणि त्यात चॉकलेट्स वगरे होते. खूप काही होतं. आता सगळे कौतुक करतायत तर खूप छान वाटतंय. सगळेच म्हणतायत की तुझं काम आम्हाला आवडलं. काहींना माझं रागावणं आवडलं, काहींना माझं वेड आवडलं. मलाही खूप भारी वाटतंय. आयुष सध्या कलर्स मराठी वाहिनीवरील 'इंद्रायणी' या मालिकेत झळकत आहे.