Ashok Saraf: मराठी सिनेसृष्टीतील ज्येष्ठ अभिनेते अशोक सराफ (Ashok Saraf) यांचा चाहता वर्ग मोठा आहे. अशोक सराफ यांनी त्यांच्या अभिनयानं प्रेक्षकांच्या मनात विशेष स्थान निर्माण केलं आहे. अशोक मामांनी फक्त मराठीतच नाही तर हिंदी सिनेसृष्टीत देखील विशेष ओळख निर्माण केली आहे. अशातच आता अशोक सराफ यांचा एक फोटो सोशल मीडियावर व्हायरल झाला आहे. हा फोटो अभिनेते सुनील बर्वे (sunil barve) यांनी शेअर केला आहे. या फोटोमधील नेमप्लेटनं अनेकांचे लक्ष वेधले आहे.

सुनील बर्वेंनी शेअर केला सेल्फी

सुनील बर्वे यांनी नुकताच एक सेल्फी शेअर केला आहे. या सेल्फीमध्ये अशोक मामांसोबत निवेदिता सराफ देखील दिसत आहे. या सेल्फीमध्ये अशोक मामा यांच्या घरावर लावलेली नेमप्लेट देखील दिसत आहे. या नेमप्लेटवर लिहिलं आहे, "धनंजय माने इथेच राहतात...श्री अशोक सराफ (द वरजिनल हास्यसम्राट)"

सुनील बर्वे यांनी अशोक मामा आणि निवेदिता सराफ यांच्यासोबतचा सेल्फी शेअर करुन कॅप्शनमध्ये लिहिलं, "काल एकदा खात्रीच करून घेतली!! ते नक्की इथेच रहातात!"

नेटकऱ्यांच्या कमेंट्स

सुनील बर्वे यांनी शेअर केलेल्या सेल्फीवर नेटकऱ्यांनी लाइक्स आणि कमेंट्सचा वर्षाव केला आहे. एका नेटकऱ्यानं या सेल्फीवर कमेंट केली, "वा छान मस्त" तर दुसऱ्या युझरनं कमेंट केली, "हे कसलं गोड आहे"

अशी ही बनवाबनवी या चित्रपटात अशोक सराफ यांनी धनंजय माने ही भूमिका साकारली. त्यांच्या या भूमिकेला विशेष पसंती मिळाली. अशी ही बनवाबनवी हा अनेकांचा ऑल टाइम फेवरेट चित्रपट आहे. या चित्रपटातील गाणी आणि डायलॉग्सनं प्रेक्षकांची मनं जिंकली.