Rahat Fateh Ali Khan Arrested: प्रसिद्ध पाकिस्तानी गायक राहत फतेह अली खान यांना पोलिसांनी दुबई विमानतळावरून अटक केली आहे. त्यांचे माजी मॅनेजर सलमान अहमद यांनी त्यांच्याविरोधात गुन्हा दाखल केला असल्याची माहिती मिळत आहे.

दरम्यान पाकिस्तानी मीडियाने दिलेल्या रिपोर्टनुसार, राहत फतेह अली खान यांचे माजी मॅनेजर सलमान अहमद यांनी त्यांच्याविरोधात तक्रार दाखल केली होती. त्यावर कारवाई करत त्यांना दुबई विमानतळावरून अटक करण्यात आले आहे. सांगितले जात आहे की, राहत फतेह अली खान यांना यूएई मध्ये बुर्ज दुबई पोलिस स्टेशनमध्ये ताब्यात घेण्यात आले होते.

मीडिया रिपोर्ट्सनुसार राहत फतेह अली खान आणि त्यांच्या माजी मॅनेजरमध्ये दीर्घकाळापासून वाद सुरू आहे. सलमान अहमद यांनी राहत फतेह अली खान यांच्याविरोधात दुबई आणि दुसऱअया शहरात देखील तक्रारी दाखल केल्या आहेत.

काही महिन्यांपूर्वी फेडरल इन्व्हेस्टिगेशन एजंसीने राहत फतेह अली खान यांच्यावर कारवाई केली होती. राहत यांच्यावर आरोप होता की त्यांनी १२ वर्षांमध्ये लोकल आणि इंटरनॅशनल म्यूझिक कॉन्सर्टमधून तब्बल आठ अब्ज रुपये कमावले आहेत. त्यामुळे एजंसीकडून त्यांच्याविरोधात मनी लॉन्ड्रिंग आणि टॅक्स चोरीच्या आरोपांचा तपास करण्यात येत होता.

यासोबतच राहत फतेह अली खान यांनी आपल्या एका शिष्याला मारहाण केल्याचा एक व्हिडीओ देखील व्हायरल झाला होता. या व्हिडीओमध्ये राहत हे चप्पलने मारहाण करताना दिसत होते.