Faisal Malik aka Prahlad Pandey Love Story: पंचायत 3 (Panchayat 3) या वेब सीरिजची सध्या चर्चा होत आहे. पंचायत या वेब सीरिजचा तिसरा सीझन 28 मे रोजी रिलीज झाला. पंचायत या वेब सीरिजच्या दोन सीझन प्रमाणेच तिसऱ्या सीझनला देखील प्रेक्षकांची पसंती मिळत आहे. या वेब सीरिजमधील कलाकारांच्या अभिनयाचं देखील अनेकजण कौतुक करत आहे. अशातच पंचायत-3 या वेब सीरिजमुळे अभिनेता फैजल मलिक (Faisal Malik) हा चर्चेत आला आहे. फैजलनं पंचायत-3 या वेब सीरिजमध्ये प्रल्हाद पांडे ही भूमिका साकारली आहे. त्याच्या भूमिकेचं अनेकजण सध्या कौतुक करत आहेत. फैजलच्या वैयक्तिक आयुष्याबद्दल जाणून घेण्यास प्रेक्षक उत्सुक आहेत.

पंचयात-3 या सीरिजमध्ये प्रल्हादची भूमिका साकारणारा फैजल हा विविध मुलाखतींमध्ये त्याच्या वैयक्तिक आयुष्याबद्दल सांगत असतो. फैजलनं नुकत्याच एका मुलाखतीत कुमुद आणि त्याच्या लव्ह स्टोरीबद्दल सांगितलं आहे. कुमुद फैजलची पत्नी आहे. कुमुद आणि फैजलच्या लग्नाला जवळपास 12 वर्ष झाली आहे. मुलाखतीत फैजलनं त्याच्या आणि कुमुदच्या हटके लग्नस्टोरीबद्दल सांगितलं.

NDTV ला दिलेल्या मुलाखतीत फैजल म्हणाला, "मी आणि कुमुदनं ना निकाह केला ना सातफेरे घेतले, आम्ही कोर्ट मॅरेज केलं आहे. कारण आमच्या दोघांचा धर्म वेगळा आहे. लग्नाच्या वेळी मा‍झ्या आईनं कुमुदला सांगितलं की, हा वेडा आहे. ज्याच्यासोबत लग्न करुन नको."

मुलाखतीमध्ये फैजलची पत्नी कुमुद म्हणाली, "आम्हाला आमच्या धर्मामुळे कधीही काही अडचण आली नाही. आम्ही प्रत्येक धर्माचा आदर करतो. आम्ही जेव्हा लग्न करायचं ठरवलं तेव्हा आम्हाला आमच्या धर्मांबाबत कळालं. लग्नाआधी तो मला कुमुद म्हणायचा आणि मी त्याला फैजल आम्ही कधी एकमेकांना पूर्ण नावानं हाक मारली नाही, त्यामुळे धर्माबाबत आम्हाला माहित नव्हतं."