Phulvanti Movie Release Date: लोकप्रिय मराठी अभिनेत्री प्राजक्ता माळी हिने तिच्या अभिनयासोबतच तिच्या नृत्यानेदेखील चाहत्यांच्या मनावर राज्य केलंय. तिने आपल्या सौंदर्याच्या जोरावर प्रेक्षकांना भुरळ घातली आहे. प्राजक्ता अभिनेत्री आणि नृत्यांगना तर आहेच सोबतच एक बिझनेस वुमनदेखील आहे. तिने दोन वर्षांपूर्वी 'प्राजक्तराज' या दागिन्यांच्या ब्रँडची निर्मिती केली होती. त्यानंतर तिने 'प्राजक्तकुंज' नावाचा एक फार्म हाऊस खरेदी केला आणि तोदेखील रेंटवर द्यायला सुरुवात केली. आज प्राजक्ताचा वाढदिवस आहे. त्यानिमित्ताने आपण काहीतरी मोठी गोष्ट शेअर करणार असल्याचं तिने आपल्या पोस्टमध्ये म्हटलं होतं. आता अखेर तिचं सरप्राइझ समोर आलं आहे. प्राजक्ताने तिच्या आगामी चित्रपटाची तारीख जाहीर केली आहे.

प्राजक्ताने काही महिन्यांपूर्वी निर्मिती क्षेत्रात पाऊल ठेवत आपल्या पहिल्या चित्रपटाची घोषणा केली होती. तो चित्रपट म्हणजे 'फुलवंती'. पद्मविभूषण बाबासाहेब पुरंदरे यांच्या अजरामर कादंबरीवर आधारित 'फुलवंती' हा चित्रपट लोकप्रिय अभिनेते आणि दिग्दर्शक प्रवीण तरडे यांच्या पत्नी आणि अभिनेत्री स्नेहल तरडे दिग्दर्शित करत आहेत. तर स्वतः प्राजक्ता या चित्रपटात मुख्य भूमिकेत आहे. नुकताच या चित्रपटाची पहिली झलक समोर आली आहे. मेण्यात बसलेली प्राजक्ता पाहून सगळेच भुलले आहेत. गुलाबी रंगाची नक्षीदार साडी आणि दागिन्यांचा थाट असलेली फुलवंती ११ ऑक्टोबर रोजी प्रदर्शित होणार आहे.

'फुलवंती'बद्दल प्राजक्ता माळी म्हणते, '' या क्षणाची मी आतुरतेने वाट पाहत होते. वाढदिवसाच्या निमित्ताने मी माझ्या चाहत्यांना ही आनंदाची बातमी देऊ शकले; याबद्दल देवाचे अनेकानेक आभार. 'फुलवंती' माझ्यासाठी खूप खास आहे. या चित्रपटाच्या निमित्ताने मी निर्मिती क्षेत्रात प्रवेश केला आणि मला अनेक गोष्टी शिकायला मिळाल्या. अनेकांनी मला विचारले की 'फुलवंती'च का ? फुलवंतीच्या कथानकाच्या मी प्रेमात पडले; साहित्य क्षेत्रातील काही दु्र्मिळ हिऱ्यांपैकी 'फुलवंती' एक आहे. त्यामुळे बाबासाहेबांच्या 'फुलवंती' या कांदंबरीवर चित्रपट व्हावा, अशी माझी मनापासून इच्छा होती.'

ती पुढे म्हणाली, 'मागील तीन वर्षांपासून अत्यंत अभ्यास करून, मेहनत घेऊन आम्ही ही भव्य 'फुलवंती' तुमच्यापर्यंत घेऊन येत आहोत. 'फुलवंती'मध्ये साथ लाभलेल्या पॅनोरमा स्टुडिओजच्या कुमार मंगत पाठक, अभिषेक पाठक, मुरलीधर छतवानी, रविंद्र औटी, मंगेश पवार, अमोल जोशी, विक्रम धाकतोडे, श्वेता माळी आणि दिग्दर्शिका स्नेहल तरडे या सगळ्यांचेच मी आभार मानते. 'फुलवंती' आता प्रेक्षकांच्या भेटीस येण्यास सज्ज झाली आहे. मला खात्री आहे, ही मराठी चित्रपटसृष्टीतील आजवरची सर्वात भव्य कलाकृती ठरेल.''