Ramayana: दिग्दर्शक नितेश तिवारी यांच्या 'रामायण' (Ramayana) या चित्रपटाची प्रेक्षक उत्सुकतेने वाट बघत आहेत. या चित्रपटात रणबीर कपूर (Ranbir Kapoor) महत्वाची भूमिका साकारणार आहे. या चित्रपटाच्या शूटिंगला सुरुवात झाली असून आता या चित्रपटाच्या सेटवरील काही फोटो आणि व्हिडीओ ऑनलाइन लीक होत आहेत. या लीक झालेल्या व्हिडीओ आणि फोटोमधील कलाकारांच्या लूकनं अनेकांचे लक्ष वेधले आहे.

सेटवरील फोटो झाले लीक

सोशल मीडियावर व्हायरल झालेल्या 'रामायण' या चित्रपटातील एका फोटोमध्ये अरुण गोविल हे दशरथ राजाच्या लूकमध्ये दिसत आहेत, तर या फोटोमध्ये लारा दत्ता ही कैकेयीच्या भूमिकेत दिसली. फोटोमध्ये लारा आणि शीबा चड्ढा या दोघी सेटवर जाताना दिसत आहे. शीबा चड्ढा ही 'रामायण' या चित्रपटात मंथरा ही भूमिका साकारणार आहे.

'रामायण' चित्रपटाच्या सेटवरील फोटोमध्ये अरुण गोविल हे काही बाल कलाकारांसोबत सीन शूट करताना दिसत आहे. या फोटोला 'झूम' हा वॉटर मार्क देण्यात आला आहे.

'रामायण' चित्रपटाची स्टार कास्ट

रणबीर 'रामायण' या चित्रपटात रामाची भूमिका साकारणार आहे तर साई पल्लवी ही या चित्रपटात देवी सीतेची भूमिका साकारणार आहे. या चित्रपटात सनी देओल हनुमानाची भूमिका साकारणार असून अभिनेता यश रावणाची भूमिका साकारण्यासाठी सज्ज झाला आहे. या चित्रपटा शूपर्णखाची भूमिका रकुल प्रीत सिंग साकारणार आणि विभीषणाची भूमिका विजय सेतुपती साकाणार असल्याचं म्हटलं जात आहे.

सेट तयार करण्यासाठी कोट्यवधींचा खर्च

रिपोर्टनुसार, 'रामायण' चित्रपटाच्या सेटसाठी निर्मात्यांनी 11 कोटी रुपये खर्च केले आहेत. रणबीरचा गेल्या वर्षी अॅनिमल हा चित्रपट रिलीज झाला. या चित्रपटानं बॉक्स ऑफिसवर धुमाकूळ घातला. आता रणबीरच्या रामायण या चित्रपटाची प्रेक्षक उत्सुकतेने वाट बघत आहेत. अॅनिमल या चित्रपटाप्रमाणेच रणबीरचा रामायण हा चित्रपट देखील बॉक्स ऑफिसवर रेकॉर्ड ब्रेक कमाई करणार का? याकडे अनेकांचे लक्ष लागले आहे.