काही महिन्यांपूर्वी बदलापूर येथे दोन चिमुकल्या मुलींवर शाळेतल्या स्वच्छतागृहात स्वच्छता कर्मचाऱ्याने लैंगिक अत्याचार केल्याची बातमी समोर आली आणि संपूर्ण महाराष्ट्र हादरून गेला. या प्रकरणी बदलापूरकरांनी रस्त्यावर उतरत आपला राग व्यक्त केला होता. बदलापूर करांनी या घटनेचा निषेध म्हणून रेल्वे अडवून धरली होती. आरोपीला फाशीची शिक्षा व्हावी, यासाठी सर्व नागरिक रस्त्यावर उतरले होते. अनेक कलाकारही तेव्हा या प्रकरणी आपली मतं मांडताना दिसले. तेव्हा या प्रकरणातील आरोपी अक्षय शिंदे याला अटक करण्यात आली. आता अक्षय शिंदेच्या एन्काउंटर नंतर एका मराठी अभिनेत्रीने पोस्ट करत आपलं मत मांडलं आहे.

अक्षय शिंदे हा सोमवारी पोलीसांबसोबत झालेल्या चकमकीत मारला गेला. ठाणे क्राइम ब्रांचच्या टीमकडून त्याला चौकशीसाठी घेऊन जात असताना ही घटना घडली. यावेळी अक्षयने पोलिसांजवळील बंदूक हिसकावरून त्यांच्या दिशेने गोळीबार केला. यावेळी प्रत्युत्तरादाखल पोलिसांनीही गोळीबार केला. या गोळीबारात या आरोपी अक्षय शिंदे ठार झाल्याची माहिती आहे. आता या प्रकरणी 'रंग माझा वेगळा' फेम अभिनेत्रीने एक पोस्ट केली आहे. 'रंग माझा वेगळा' मालिकेतील अभिनेत्री विदिशा म्हसकर हिने तिच्या इंस्टाग्राम स्टोरीवर पोस्ट करत लिहिलं, 'शाळेतील लहान मुलींवर अत्याचार करणारा आरोपी महाराष्ट्र पोलिसांकडून मारला गेला आहे. यामुळे नागरिकांनी मुख्यमंत्री एकनाथ शिंदे यांचे आभार मानले आहेत.'

खऱ्या आयुष्यातील सिंबा

तिने पुढे लिहिलं, 'यामुळे नागरिकांनी मुख्यमंत्री एकनाथ शिंदे यांचे आभार मानले आहेत’ आणि ही पोस्ट विदिशाने शेअर करत “खऱ्या आयुष्यातील सिंबा, सिंघम स्टोरी” असं म्हटलं आहे. तसंच या पोस्टद्वारे तिने आनंदही व्यक्त केला आहे. विदिशाच्या कामाबद्दल सांगायचं तर, ती ‘रंग माझा वेगळा’ या मालिकेमुळे घराघरात पोहोचली. यापूर्वी विदिशाने बऱ्याच मालिकांमध्ये काम केलं आहे. ‘कलर्स मराठी’वरील ‘हे मन बावरे’ या मालिकेतही तिनं खलनायिकेची भूमिका निभावली होती. त्यानंतर ‘रंग माझा वेगळा’, ‘३६ गुणी जोडी’ आणि ‘भाग्य दिले तू मला’ अशा मालिकेत काम केलं आहे.