Rhea Kapoor : आज सगळीकडे चर्चा आहे ती अनंत अंबानी आणि राधिका मर्चंट यांच्या आलिशान विवाहसोहळ्याची. आज रात्री पार पडणाऱ्या या विवाहसोहळ्याची जय्यत तयारी गेले वर्षभर सुरु होती आणि लग्नापूर्वीचे सगळे कार्यक्रम विशेष गाजले. या सगळ्या कार्यक्रमात नववधू राधिकाचे लूक चर्चेत राहिले. प्रत्येक कार्यक्रमातील तिच्या आऊटफिटची खास चर्चा झाली. हे सगळे लूक डिझाईन केले होते अभिनेत्री सोनम कपूरची बहीण आणि स्टायलिस्ट रिहा कपूरने. सोशल मीडियावर रिहाने राधिकाला खास पोस्ट शेअर केली.

रिहाची पोस्ट

राधिकाचे आतापर्यंतच्या सगळ्या कार्यक्रमातील विविध लूकचे फोटो पोस्ट करत रिहाने खास पोस्ट राधिकासाठी लिहिली आणि तिच्या संपूर्ण टीमचं तिने यावेळी कौतुकही केलं. "आमच्या मुलीचं आज रात्री लग्न होणार आहे." असं कॅप्शन रिहाने या पोस्टला दिलं आणि तिच्याबरोबर या लग्नासाठी काम करणाऱ्या प्रत्येक व्यक्तीच तिने या पोस्टच्या माध्यमातून आभार मानले.

शिरीना, सनाया कपूर, मेघना, सुजाता, लव्हलीन, हिरल भाटिया, डॉली जैन या स्टायलिंग क्षेत्रातील नामवंतांनी राधिकाच्या लग्नासाठी विशेष मेहनत घेतली आहे. शिरीना आणि सनाया यांनी राधिकाच्या प्रत्येक लूकच स्टायलिंग केलं होतं तर राधिकाच्या साड्या डॉली जैन यांनी तिला नेसवल्या होत्या. तर लव्हलीन आणि हिरल भाटिया यांनी राधिकाचा मेकअप केला होता. तर मेघना आणि सुजाता यांनीही या राधिकाच्या लग्नातील प्रत्येक लूककडे लक्ष दिलं होत.

ग्रहशांती पूजेवेळी राधिकाने नेसलेली सोनेरी काठ असलेली पांढरी साडी असो किंवा शिवशक्ती पूजेवेळी नेसलेला जांभळ्या रंगाचा पटोला पद्धतीचा लेहेंगा, मौसालु या कार्यक्रमावेळी तिने घातलेला रंगीबेरंगी लेहेंगा किंवा हळदीवेळी मोगऱ्याचा विणलेला दुपट्टा आणि पिवळ्या रंगाचा लेहेंगा या सगळ्या लूकचं विशेष कौतुक होतंय. तिचे हे सगळे लूक खूप गाजले.

आज १२ जुलैला रात्री ८ वाजता राधिका आणि अनंतचं लग्न मुंबईतील जिओ कॉनव्होकेशन सेंटरमध्ये पार पडणार आहे. या लग्नाला देशविदेशातील दिग्गज मंडळी हजेरी लावणार आहेत.