छोट्या पडद्यावरील लोकप्रिय अभिनेत्री रुबीना दिलैक आणि अभिनेता अभिनव शुक्ला यांची जोडी चाहत्यांची प्रचंड आवडती आहे. त्यांची लव्हस्टोरी देखील अगदीच वेगळी आहे. रुबीना आणि अभिनव यांनी लग्नानंतर वेगळं व्हायचा निर्णय घेतला होता. मात्र ते दोघेही एकत्र बिग बॉस मध्ये गेले आणि त्यांची आपल्या नात्याला पुन्हा एक संधी देण्याचा विचार केला. आता ते पुन्हा एकत्र आले आहेत. लग्नाच्या अनेक वर्षानंतर रुबीना आणि अभिनव आईबाबा झाले होते. अभिनेत्रीने गेल्या वर्षी जुळ्या मुलींना जन्म दिला होता. आता अखेर त्यांच्या जन्माच्या ११ महिन्यांनी त्यांनी आपल्या लाडक्या लेकीचं चेहरा चाहत्यांना दाखवला आहे. मुलींचा गोंडस चेहरा पाहून नेटकरी त्यांच्या प्रेमात पडले आहेत.

रुबिनाने नोव्हेंबर २०२३ मध्ये मुलींना जन्म दिला होता. आता या नवरात्रीच्या मुहूर्तावर तिने आपल्या लेकीचं चेहरा चाहत्यांना दाखवला आहे. एधा आणि जीवा या तिच्या मुलींना पाहून चाहते त्यांच्यावर फिदा झाले आहेत. त्यांच्या साधेपणाने चाहत्यांचं मन जिंकलं आहे. एधा आणि जीवा यांच्या कपाळावर काळ्या रंगाची टिकली आहे. तर डोक्यावर हेअरबॅन्ड आहे. काही फोटोंमध्ये त्या रुबीनासोबत दिसत आहेत तर काही फोटोंमध्ये त्या अभिनवसोबत दिसत आहेत. त्यांचे फोटो शेअर करत अभिनेत्रीने लिहिलं, 'नवरात्रीच्या या शुभ मुहूर्तावर एधा आणि जीवा यांच्याशी भेट करून देतेय. संयम बाळगून आमची वाट पाहिल्याबद्दल सगळ्यांचे आभार.

रुबीनाची ही पोस्ट सध्या प्रचंड व्हायरल होतेय. यावर अनेक नेटकऱ्यांनी प्रतिक्रिया देत त्यांच्यावर लाइकचा वर्षाव केला आहे. तर नेटकऱ्यांसोबतच अनेक कलाकारांनीही त्यांच्या फोटोवर कमेंट केल्या आहेत. भारती सिंहने प्रतिक्रिया देत लिहिलं, 'जय माता दि' तर लवकरच आई होणार असलेल्या दृष्टी धामी हिने लिहिलं, 'खूप गोड आहेत.' डोक्यावर काली टिकली आणि हातात चांदीचा कडा घातलेल्या रुबीनाच्या मुलींनी सगळ्यांचं मन जिंकलं आहे.