लोकप्रिय अभिनेत्री रुपाली भोसले 'आई कुठे काय करते' या मालिकेतून प्रेक्षकांच्या भेटीला येते. तिने नुकतंच तिचं मोठं स्वप्न पूर्ण केलं. अहोरात्र मेहनत करत तिने मुंबईत हक्काचं स्वतःचं घर घेतलं. गेले वर्षभर ती या घरावर काम करत होती. आपल्या आईवडिलांना हक्काच्या घरात नेण्याचं रुपालीचं स्वप्न आता सत्यात उतरलं आहे. तिच्या घराचं इंटेरिअर सगळ्यांचं लक्ष वेधून घेत आहे. त्यात आणखी एक गोष्ट चर्चेत आहे ती म्हणजे रुपालीच्या घराची नेमप्लेट. या नेमप्लेटवर मात्र रुपालीचं नाव नाहीये. असं का हे तिने स्वतः सांगितलं आहे.

या घरासाठी खूप मेहनत करूनही रुपालीने या घराच्या नेमप्लेटवर आपलं नाव लिहिलेलं नाही. या नेमप्लेटवर रुपालीच्या आई, बाबा आणि भावाचं नाव आहे. राजश्री मराठीशी बोलताना याचं कारण सांगत रुपाली म्हणाली, 'मी त्यांच्या घरात राहतेय. माझं कायम हे म्हणणं होतं की, मला त्यांच्यासाठी काहीतरी करायच आहे. त्यामुळे त्यांच्यासाठी करत असताना मी माझं, माझं पुढे करण्यात काही अर्थ नाहीये. मी कायम हे नवं घर बनवताना आईला कसं किचन हवंय? पप्पांना कुठला रंग हवाय? संकेतला बेडरुम कशी हवीये? याच्याकडे मी फार लक्ष दिलं आणि त्या पद्धतीनं घर करून घेतलं.'

रुपाली पुढे म्हणाली, 'कुठेही त्यांना असं वाटता कामा नये की आपलं काहीच नाहीये. पण कायदेशीर रित्या जे काही कागदपत्र आहेत तिथे जरी माझं नाव असलं तरी हे त्यांचं घर आहे.' आता चाहते रुपालीचं घर पाहण्यासाठी उत्सुक आहेत. रुपालीने अजून तरी तिच्या घराचे आणि पूजेचे फोटो चाहत्यांसोबत शेअर केलेलं नाहीत. तरीही नेटकरी वेगवेगळ्या माध्यमातून तिच्यावर शुभेच्छांचा वर्षाव करत आहेत.