अभिनेता सलमान खानच्या वांद्रे येथील गॅलेक्सी अपार्टमेंटमधील घरावर अज्ञात हल्लेखोरांनी केलेल्या हल्ल्याची बातमी सध्या सगळीकडेच गाजतेय. रविवारी 15 एप्रिलला झालेल्या या हल्ल्यावेळी सलमानसह त्याचे सगळे कुटूंबीय घरातच उपस्थित होते.

त्याच्यावरील या हल्ल्यामुळे देशभरातील त्याचे चाहते चिंतीत असून सुरक्षायंत्रणासुद्धा सक्रिय झाल्या आहेत. पोलिसांनी या घटनेचा तपास करण्यास सुरुवात केली सलमानच्या घरावर हल्ला करणाऱ्या या दोन हल्लेखोरांची ओळख पटवण्यात पोलिसांना यश मिळालं आहे.

या घटनेनंतर पोलिसांनी तात्काळ तपासला सुरुवात करत आसपासचे सर्व सीसीटीव्ही फुटेज तपासले आणि प्रत्यक्षदर्शींची चौकशी केली. या फुटेजमधून या हल्लेखोरांची ओळख पटवण्यात पोलिसांना यश आले आहे.

सूत्रांच्या माहितीनुसार, सीसीटीव्ही फुटेजमध्ये दिसणारा हल्लेखोर विशाल उर्फ काळू नावाचा गुंड असल्याचा पोलिसांचा अंदाज आहे. विशाल हा रोहित गोदारा गँगशी संबंधित असून या आधी त्याच्यावर सचिन गोडा या व्यावसायिकाच्या हत्येचा गुन्हा दाखल करण्यात आला आहे.

सूत्रांच्या माहितीनुसार, सलमान खानच्या घरावर हल्ला केल्यानंतर हल्लेखोर बाईक माऊंट मेरी इथे सोडून गेले आणि त्यांनी पुढील प्रवास रिक्षेने केला. ते महाराष्ट्राबाहेर पळालेले असू शकतात असा अंदाज पोलिसांनी बांधला आहे. दोन्ही हल्लेखोर हरियाणा किंवा राजस्थान या भागातील रहिवासी असल्याचा अंदाज आहे. या हल्लेखोरांना प्रवासात कुणी मदत केली आणि त्यांना हत्यारे कुणी पुरवली याचा सध्या पोलीस तपास करत आहेत.

सलमानच्या घरावरील हल्ल्याची बातमी सगळीकडे पसरल्यानंतर लॉरेंस बिश्नोई गँगच्या अनमोल बिश्नोईने फेसबुक पोस्ट शेअर करत या हल्ल्याची जबाबदारी स्वीकारली.

सुरुवातीला पोलिसांनी या पोस्टला गांभीर्याने घेतलं नाही पण हल्लेखोरांच्या चेहऱ्याची ओळख पटताच हा हल्ला बिश्नोई गॅंगतर्फेच केलेला असावा अशी खात्री पोलिसांची पटलेली आहे.

या आधीही सलमानला लॉरेंस बिश्नोई गँगतर्फे धमक्या मिळाल्या होत्या. सलमानच्या सुरक्षितेत वाढ करण्यात आली असून त्याला आता वाय प्लस दर्जाची सुरक्षा देण्यात येणार असल्याचं म्हंटलं जातंय