Shah Rukh Khan: बॉलिवूडमधील प्रसिद्ध अभिनेत्री अनुष्का शर्मा (Anushka Sharma) हिचा आज (1 May) वाढदिवस आहे. अनुष्काला सोशल मीडियाच्या माध्यमातून अनेक जण वाढदिवसाच्या शुभेच्छा देत आहेत. अनुष्कानं सात वर्षांपूर्वी क्रिकेटर विराट कोहलीसोबत (Virat Kohli) लग्नगाठ बांधली. विराट आणि अनुष्का हे कपल 'पावर कपल' म्हणून ओळखलं जातं. नुकत्याच एका मुलाखतीमध्ये बॉलिवूडचा किंग खान अशी ओळख असणाऱ्या शाहरुख खाननं (Shah Rukh Khan) विराट आणि अनुष्का यांचे कौतुक केलं आहे. या मुलाखतीमध्ये शाहरुख म्हणाला की, "विराट हा बॉलिवूडचा जावई आहे."

काय म्हणाला शाहरुख खान?

स्टार स्पोर्ट्सला दिलेल्या मुलाखतीत शाहरुख खान म्हणाला, "मी विराट कोहलीसोबत खूप वेळ घालवला आहे, मला तो खूप आवडतो. तो आमच्या क्षेत्राचा (बॉलिवूडचा) जावई आहे. इतर खेळाडूंच्या तुलनेत मी त्याला सर्वात जास्त ओळखतो. मी विराट आणि अनुष्काला खूप दिवसांपासून ओळखतो. मी त्यांच्यासोबत खूप वेळ घालवला आहे. मी त्याला तेव्हापासून ओळखतो जेव्हा तो अनुष्काला डेट करत होता. मी अनुष्कासोबत चित्रपटाचे शूटिंग करत होतो. त्यावेळी विराटनं आमच्यासोबत बरेच दिवस घालवले. तेव्हा आमच्या मैत्री झाली."

शाहरुखनं विराटला शिकवला डान्स

काही दिवसांपूर्वी विराट आणि शाहरुख यांचा एक व्हिडीओ सोशल मीडियावर व्हायरल झाला होता. या व्हिडीओमध्ये विराट आणि शाहरुख हे पठाण चित्रपटातील झूमे जो पठाण या गाण्याची हूक स्टेप करताना दिसले. याबद्दल शाहरुख म्हणाला, "मी त्याला पठाण चित्रपटातील गाण्याची स्टेप्स शिकवली. मी त्याला एका सामन्यात पाहिले होते,तो रवींद्र जडेजासोबत डान्स करत होता. ती डान्स स्टेप करण्याचा तो प्रयत्न करत होता."

रब ने बना दी जोडी, जब तक है जान, जब हॅरी मेट सेजल आणि झिरो या चित्रपटांमध्ये शाहरुख आणि अनुष्का यांनी एकत्र काम केलं आहे.