Munjya On Ott: २०२४ मधील सर्वाधिक गाजणाऱ्या चित्रपटांपैकी एक ठरलेला चित्रपट म्हणजे आदित्य सरपोतदार यांचा 'मुंज्या'. कोकणातल्या मुंज्या या भुताच्या कथेवर आधारित या चित्रपटाने प्रेक्षकांना अक्षरशः वेड लावलंय. या चित्रपटाने बॉक्स ऑफिसवर धुमाकूळ घातला आहे. या चित्रपटाने प्रेक्षकांना कोकणाची सफर करवून आणली. २०२४ मधील सर्वाधिक कमाई करणाऱ्या चित्रपटांपैकी हा एक चित्रपट ठरला आहे. मात्र आता हाच मुंज्या तुम्हाला घरबसल्या पाहता येणार आहे. लवकरच 'मुंज्या' ओटीटी प्लॅटफॉर्मवर येणार आहे. आता पर्यंत या चित्रपटाने ६४ कोटींची कमाई केली आहे.

'स्त्री', 'रुही', 'भेडिया' याचित्रपटानंतर मॅडॉक सुपरनॅचरल युनिव्हर्समधील ‘मुंज्या’ हा चौथा चित्रपट आहे. उत्तम हॉरर कॉमेडी असलेला हा चित्रपट प्रेक्षकांना रोमान्सच्या जगातही नेतो. या चित्रपटातील मराठी कलाकारदेखील सध्या चर्चेचा विषय ठरले आहेत. चित्रपटात एका हट्टी मुलाची एका मुलीशी लग्न करण्याची इच्छा अपूर्ण राहते. त्यापूर्वीच त्याचा मृत्यू होतो. आणि इथूनच खरी कथा सुरू होते. अतिशय वेगळी अशी कथा यानिमित्ताने प्रेक्षकांना पाहायला मिळतेय त्यामुळेच प्रेक्षक तिकीट खिडकीवर गर्दी करत आहेत. आता हाच मुंज्या तुमच्या घरी येणार आहे.

कुठे पाहता येणार चित्रपट?

मीडिया रिपोर्ट्सनुसार, हा चित्रपट ओटीटी प्लॅटफॉर्म Disney + Hotstar वर प्रदर्शित होणार आहे. अभय वर्मा आणि शर्वरी वाघ अभिनीत या चित्रपटाचे डिजिटल अधिकार ओटीटी प्लॅटफॉर्म Disney Plus Hotstar ने विकत घेतले आहेत आणि आजपासून 2 महिन्यांनंतर हा चित्रपट OTT वर प्रदर्शित होणार आहे.