विविध मालिका, रिएलिटी शो आणि सोशल मिडीयावरील वक्यव्यांसाठी चर्चेत असलेले किरण माने पुन्हा एकदा वेगळ्या कारणासाठी चर्चेत आलेत. सोशल मिडीयावर सडतोड वक्तव्यासाठी देखील किरण माने चर्चेत असतात. मात्र आता त्यांच्या पोस्टसाठी नाही तर कामासाठी किरण मानेंविषयी बोललं जातय.

किरण मानेंविषयीची चर्चा त्यांच्या नव्या मालिकेविषयी आहे. सन मराठी वाहिनीवर येणारी आगामी मालिका ‘तिकळी’ मध्ये किरण माने महत्त्वाच्या भूमिकेत झळकणार आहे. नुकताच या मालिकेचे प्रोमो देखील प्रदर्शित झाले आहेत. शिवाय किरण माने यांच्या भूमिकेचा नवा प्रोमो देखील प्रदर्शित झालाय. या प्रोमोतील किरण माने यांचा अंदाज लक्षवेधी ठरतोय. या मालिकेत किरण माने नकारात्मक भूमिकेत झळकणार आहेत.

या मालिकेत ते बाबाराव खोत ही भूमिका साकारणार आहे. या प्रोमोमध्ये म्हटल्याप्रमाणे "जेवढा जमिनीवर दिसतो त्याच्या दहा पट खाली जमिनीत असलेला हा... बाबाराव खोत." असा या भूमिकेचा उल्लेख करण्यात आलाय.या प्रोमोमध्ये किरण माने बाबाराव खोतच्या भूमिकेत म्हणतात की, “मी जे ठरवतो ते घडतं, मी ते घडवतो”. बाबाराव खोत हा अंधश्रद्धाळू देखील दाखवलाय. मात्र ‘तिकळी’ ही मालिका अंधश्रद्धेच्या विरोधातली असल्याचं म्हटलय. यात किरण माने यांचा क्रूर अंदाज पाहायला मिळतोय. पहिल्यांदाच किरण माने अशा क्रूर, नकारात्मक भूमिकेत झळकणार आहेत. १ जुलै पासून ही मालिका सन मराठी वाहिनीवर पाहायला मिळणार आहे.

‘मुलगी झाली हो’ या स्टार प्रवाह वाहिनीवरील मालिकेतील किरण माने यांची भूमिका प्रचंड लोकप्रिय ठऱली होती. विलास पाटीलच्या वडिलांच्या भूमिकेत किरण माने यांना प्रेक्षकांची पसंती मिळाली होती. मात्र त्या मालिकेच्या वाहिनीसोबतच्या वादानंतर किरण माने विविध चित्रपट, मालिकांमध्ये झळकले होते. बिग बॉस मराठी सिझन ४ मध्येही किरण माने झळकले होते. या कार्यक्रमातून किरण मानेंना आणखी लोकप्रियता मिळाली. कलर्स मराठी वाहिनीवरील ‘सिंधूताई माझी माई’ या मालिकेतही किरण माने यांनी महत्त्वाची भूमिका साकारली होती. सिंधूताईंच्या वडिलांच्या भूमिकेत ते झळकले होते. याचवर्षी किरण माने यांनी राजकारणातील वाटचाल देखील सुरु केली. उद्धव ठाकरे शिवसेना गटात त्यांनी प्रवेश केला होता.