Rangpanchami Mahasangam : होळी या सणानिमित्त सोनी मराठी वाहिनीने ‘रंगपंचमी महासंगम’ कार्यक्रमाचे आयोजन केले आहे. महासंगम म्हणजेच सोनी मराठीवरील सगळ्याच मालिकांतील प्रेक्षकांना आवडणाऱ्या व्यक्तिरेखा आपल्याला एकत्र पाहायला मिळणार आहेत.

हे सगळे कलाकार रंगमंचमी खेळताना दिसणार आहेत. ‘अबोल प्रीतीची अजब कहाणी’ मालिकेतील सराफ परिवाराने सगळ्या व्यक्तिरेखांना आपल्या घरी होळी पार्टीनिमित्त एकत्र बोलावले आहे. यामिनी सराफ यांनी या सोहळ्याचे आयोजन केले असून राजवीर आणि मयुरी हे या सगळ्या पाहुण्यांचे आदरातिथ्य करणार आहेत.

या पार्टीमध्ये वीरू आणि प्राजक्ता, मीरा आणि मल्हार, बयो आणि डॉ. विशाल, यशोधन आणि असीम हे सगळे कलाकार एकत्र दिसणार आहेत. या रंगपंचमी पार्टीमधील प्रमुख बाब म्हणजे या कलाकारांचे पेहराव. सगळ्या जोड्या वेगवेगळ्या रंगांचे प्रतिनिधित्व करणार आहेत. रंगपंचमी म्हटले की, आपल्या डोळ्यांसमोर निरनिराळे रंग दिसतात.

तशाच विविध रंगांमध्ये हे कलाकार पाहायला मिळतील. शिवाय या ‘महासंगम’मध्ये या प्रत्येक कलाकाराचे विशेष असे नृत्य सादरीकरण प्रेक्षकांना पाहायला मिळणार आहे. होळी विशेष आणि प्रेक्षकांना आवडणाऱ्या निरनिराळ्या गाण्यांवर हे कलाकार थिरकताना दिसतील.