दाक्षिणात्य सुपरस्टार अल्लू अर्जुन सध्या ‘पुष्पा २ : द रुल’साठी चर्चेत आहे. त्याला ‘पुष्पा : द राइज’ या चित्रपटामुळे जागतिक स्तरावर ओळख मिळाली. आता अल्लू अर्जुनचा दुबईतील मादाम तुसॉ या संग्रहालयात मेणाचा पुतळा उभारण्यात आला आहे. नुकतेच त्याने त्याच्या मेणाच्या पुतळ्याचे अनावरण केले.

सोबतच त्याने आपल्या पुतळ्यासह ‘पुष्पा’ची आयकॉनिक पोज देत फोटो काढले. त्याने हे फोटो सोशल मीडियावर शेअर केले आहेत. ते आता प्रचंड व्हायरल होत आहेत. त्याच्या या पोस्टवर चाहत्यांकडून आणि सेलिब्रेटींकडून अभिनंदनाचा वर्षाव होत आहे. या फोटोमधील खरा अल्लू अर्जुन कोणता? हे नेटकऱ्यांना ओळखणे कठीण झाले आहे.

मादाम तुसॉ म्युझियमच्या इन्स्टाग्राम अकाऊंटवर एक व्हिडीओ शेअर करण्यात आला आहे. ज्यामध्ये अल्लू अर्जुनचा मेणाचा पुतळा प्रदर्शित करण्यात आला आहे. स्वत:चा मेणाचा पुतळा पाहून अल्लू अर्जुनला आनंद झाला, असे व्हिडीओमध्ये दिसत आहे. ‘द बिग रिव्हिल, अल्लू अर्जुनने दुबईतील त्याचा मेणाचा पुतळा पाहिला,’ असे कॅप्शन या व्हिडीओला देण्यात आले आहे.