Taapsee Pannu: लोकप्रिय बॉलिवूड अभिनेत्री तापसी पन्नू अभिनयासोबतच तिच्या बिनधास्त बोलण्यासाठी ओळखली जाते. तिने २०१३ साली डेविड धवन यांच्या 'चश्मेबद्दूर' या चित्रपटातून अभिनय क्षेत्रात पाऊल ठेवलं होतं. तिने 'पिंक', 'थप्पड़', 'मुल्क' और 'हसीन दिलरुबा' यांसारखे हिट चित्रपट दिले. काही महिन्यांपूर्वीच तापसी लग्नबंधनात अडकली. आता पुन्हा एकदा तापसी सोशल मीडियावर चर्चेत आहे त्याचं कारण आहे तिने केलेलं एक विधान. एका मुलाखतीत तापसीने स्वतःची तुलना थेट अभिनेत्री प्रीती झिंटासोबत केली आहे.

काय म्हणाली तापसी?

तापसीने नुकतीच शिखर धवन याच्या 'धवन करेंगे विथ शिखर धवन' या कार्यक्रमात हजेरी लावली. या कार्यक्रमात बोलताना तापसीने स्वतःचं कौतुक केलं आणि स्वतःच्या दिसण्याची तुलना प्रीती झिंटासोबत केली. ती म्हणाली, 'मला मुळातच बॉलिवूडमध्ये यामुळे आणलं गेलं कारण मी प्रीती झिंटासारखी दिसते. माझा चेहरा बऱ्यापैकी तिच्या चेहऱ्यासारखा आहे. त्यांच्यात खूप पॉझिटिव्ह एनर्जी आहे आणि हे तुम्हाला चांगलंच ठाऊक आहे. मला वाटतं की मला त्यांच्या प्रतिष्ठेला शोभेल असं काम केलं पाहिजे. कारण मी त्यांच्या नावामुळे इंडस्ट्रीमध्ये आली. त्यामुळे मी कायम त्यांच्या सारखं बनण्याचा प्रयत्न केला आहे.

तापसीने प्रीतीला बुद्धिमान आणि उत्साही म्हणत तिचं कौतुक केलं आहे. तिचं हे वक्तव्य सध्या सोशल मीडियावर व्हायरल होत आहे. अनेक नेटकरी तापसी तिच्याच तोंडाने तिचं कौतुक करत आहे असं म्हणत तिची थट्टा करत आहेत. तापसीने यावर्षी बॅडमिंटन कोच मॅथियस बोशी उदयपूरमध्ये लग्नगाठ बांधली. तिच्या कामाबद्दल सांगायचं तर ती शेवटची राजकुमार हिरानी यांच्या 'डंकी' चित्रपटात शाहरुखसोबत दिसली होती. आता ती लवकरच 'फिर आई हसीन दिलरुबा' मध्ये दिसणार आहे. यात ती विक्रांत मेस्सी आणि सनी कौशल यांच्यासोबत दिसणार आहे.